Prezidente APORTIL, Flávio Cardoso Neves. Imajen TATOLI/António Gonçalves

DILI, 03 fevereiru 2021 (TATOLI)-Autoridade Portuáriu Timor-Leste (APORTIL) no Autoridade Aduaneira (AA)/Alfándega sei halo koordenasaun hodi halo interligasaun sistema, nune’e bele halo kontrolu iha Portu Dili.

”Ha’u koordena ona ho Alfándega atu liga sistema APORTIL nian ho sistema Alfándega ne’ebé uza ASYCUDA World atu ba oin ita bele kontrola movimentu iha portu ho di’ak,” Prezidente APORTIL, Flávio Cardoso Neves, hateten ba Agência TATOLI iha Portu Dili, kuarta ne’e.

Notísia relevante: Governu Lansa Ona Sistema Asycuda World Iha APORTIL

Nia konsidera, sistema interligadu importante atu máximiza di’ak liután sistema dijitál liga ba kontrolu servisu iha portu.

“Bainhira ita ko’alia kona-ba funsionamentu servisu portuáriu, liuliu  kontentór no ró sira, tama mai oinsá atu kontrolu sira. Tanba dala ruma ró kontentór lori sasán, Alfándega halo pasa revista, entaun ita presiza halo sistema ida-ne’e atu hafasil kontrolu. Ha’u espera inisiativa ne’e bele lori reseita di’ak liután liuhosi servisu portu,” nia akresenta.

Flávio Cardoso dehan, atu jere sistema ho di’ak maka funsionáriu APORTIL rasik tuir treinamentu hodi hasa’e koñesimentu ba sistema ne’e rasik, nune’e ba futuru halo operasaun ho di’ak.

“Ami-nia ema sira hahú tuir ona treinamentu ba  sistema ne’e atu jere no halo kontrolu,” nia tenik.

Prezidente rekoñese, atu hasa’e reseita iha portu presiza introdús sistema dijitál, nune’e bele ajuda halo atendimentu.

Iha loron 15 agostu 2018, Governu liuhosi Ministériu Transporte no Komunikasaun (MTK) lansa The Automated System for Customs Data (ASYCUDA) World iha APORTIL hodi fasilita servisu importasaun no esportasaun sira iha portu.

Sistema ne’e fasilita prosesa sasán ne’ebé importa no esporta, ne’ebé integradu ba jestaun komérsiu nian.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here