Aung San Suu Kyi. Imajen/Espesiál.

DILI, 02 fevereiru 2021 (TATOLI)–Parlamentu Nasionál (PN) Timor-Leste nian konsidera progresu demokrasia iha Burma la’o ba kotuk tanba lakohi simu rezultadu eleisaun ne’ebé ezerse hosi povu.

Vise-Prezidentu Nasionál, Deputada Maria Angelina Lopes Sarmento, hateten Timor-Leste mós hola-parte iha ASEAN Parliamentarians for Human Rights (APHR) ka parlamentu ASEAN nian ba direitu umanu, lamenta ba akontesimentu ne’ebé akontese iha Myanmar (Burma)

“Ida-ne’e espresaun hatudu katak povu lakohi ona ditadura militár. Haree ba progresu ne’ebé Burma hasoru, ita bele dehan sira-nia progresu ba demokrasia no direitu umanu hakiduk ba kotuk, tanba ne’e Timor-Leste nu’udar membru estraordinária atu sai membru permanente ba ASEAN, hakarak solidariza povu tomak Burma nian, ne’ebé oras ne’e iha situasaun lamentavel tanba sira-nia demokrasia laiha progresu,” Vise-Prezidente Parlamentu Nasionál ne’e informa liuhosi konferénsia imprensa, iha PN, tersa ne’e.

Nia afirma, iha Burma hala’o eleisaun parlamentár iha fulan-novembru 2020 liubá no partidu mai hosi lideransa sivíl sira hanesan Partidu Liga Nasionál ba Demokrasia (NLD-sigla inglés) ne’ebé lidera hosi Aung San Suu Kyi.

Partidu ne’ebé lidera hosi Aung San Suu Kyi mak hetan votu maioria iha eleisaun parlamentár maibé rejime didatura nian mak foti tiha prosesu ida-ne’e no detein tiha Aung San Suu Kyi ho ninia membru sira hotu.

Nia dehan, rejime militár ne’e akuza tán Komisaun Nasionál Eleisaun Burma nian makonu ho fraude maibé rezultadu eleisaun povu maioria fó fiar ba lideransa ema sivíl.

Deputada PLP ne’e husu Aung San Suu Kyi atu ho korajen enfrenta situasaun ida-ne’e.

Nia afirma, maske Timor-Leste seidauk sai membru permanente ba ASEAN maibé haree hosi perspetiva direitu umanu nian loloos situasaun ne’e labele akontese.

Nia husu atu rejime militár ne’e husik livre Aung San Suu Kyi nune’e foti fali parlamentu.

“Maibé partidu ida-ne’ebé hetan back up hosi militár rekuza eleisaun ne’ebé manán eleisaun no konsidera eleisaun ne’e la demokrátiku no nakonu ho fraude. Maibé ida-ne’e espresaun populár tanba povu Myanmar lakohi moris ho rejime militár,” nia dehan. 

Parlamentu Nasionál Timor-Leste nian ne’ebé sai mós membru parlamentu ASEAN nian kondena makaas situasaun ne’ebé impoin hosi militár sira iha Burma.

“Ami hato’o ba rejime militár, bele iha diálogu ida ho grupu Aung San Suu Kyi hodi buka solusaun liuhosi diálogu, la’ós uza dalan ditadura militár,” Vise-Prezidente PN ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here