Ministru Transporte Komunikasaun, José Agostinho da Silva. Imajen TATOLI/Egas Cristovão

DILI, 02 fevereiru 2021 (TATOLI)–Ministériu Transporte no Komunikasaun, José Agustinho da Silva, atualiza serbisu ministériu ba Primeiru-Ministru (PM), Taur Matan Ruak.

“Informa kona-ba armoniza no salva situasaun komunikasaun, aselera prosesu alterasaun dekretu-lei núneru 15/2012 kona-ba rejime jurídiku Autoridade Nasionál Komunikasaun (ANC, sigla portugés) atu regulariza rede telekomunikasaun sira tantu rede operadór no rede externál sira ne’ebé durante ne’e hala’o operasaun iha rai laran,” ministru José Agostinhos, informa iha Palásiu Governu, tersa ne’e.

Aleinde ne’e, informa mós kona-ba implementasaun despaisu konjuntu entre Ministériu  Interiór ho Ministériu  Transporte no Komunikasaun kona-ba regulamentasaun movimentu veíkulu pezadu no kontentór sira.

“Despaisu ne’e hahú implementa iha loron 01 fevereiru liubá, ne’ebé ha’u orienta ona tékniku sira entre liña ministeriál sira atu monitoriza no avalia progresu implementasaun despaisu iha terrenu no halo avaliasaun loron-loron, nune’e bele evita engarafamentu no dezastre tráfegu sira ne’ebé ita hotu la espera atu akontese,” nia akresenta.

Aleinde ne’e, governante ne’e relata mós kona-ba akordu servisu aéreu entre Timor-Leste ho Austrália.

Biban ne’e, Ministru simu orientasaun serbisu husi Xefi Governu ba atividade ministériu nian hodi serví públiku di’ak liután.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here