Observasaun jornalista iha terrenu, loja balun uza plástiku hanesan embalajen ba produtu ne’ebé kompradór sosa, maski dekretu-lei vigora ona. Imajen TATOLI/Antónia Gusmão

DILI, 02 fevereiru 2021 (TATOLI)—Maski dekretu-lei númeru 37/2020 kona-ba eliminasaun no importasaun saku plástiku, uzu úniku embalajen no objetu husi materiál plástiku hahú vigora iha loron 23 janeiru, maibé loja balun iha kapitál Dili nafatin uza plástiku.

Tuir observasaun jornalista Agência TATOLI iha terrenu, nota katak bainhira ema mai sosa sasán, funsionáriu sira sei uza plástiku nu’udar embalajen.

Hafoin halo observasaun, jornalista tenta hakbesik hodi husu traballadór ne’ebé atende hela kompradór sira hodi husu tanba sá nafatin utiliza plástiku, enkuantu ministériu alerta ona.

“Loos duni ami nafatin uza plástiku tanba ami-nia plástiku sei barak. Ami iha ne’e hala’o de’it serbisu,” informa traballadór Florinda (la’ós naran loloos) ba Agência TATOLI, iha nia serbisu fatin, tersa ne’e.

Notísia relevante: SEA alerta, 23 janeiru 2021 labele uza plástiku iha loja

Antes ne’e, Sekretáriu Estadu Ambiente, Démetrio do Amaral de Carvalho, informa ba públiku liliu loja sira, hahú loron 23 janeiru 2021, Governu liuhosi instituisaun tutela implementa ona dekreta-lei eliminasaun no importasaun saku plástiku.

Dekretu-lei ne’e promulga ona husi Prezidente Repúblika, Francisco Guterres ‘Lú Olo’ iha loron 23 setembru 2020.

Aleinde ne’e, Sekretaria Estadu Ambiente (SEA) prodús ona sirkulár ida ne’ebé hola parte mós iha planu ezekusaun dekretu-lei númeru 37/2020.

Iha sirkulár ne’e mensiona, target prinsipál mak atu halo hotu saku ne’ebé sei iha stock hela, nune’e labele uza tan.

Maski nune’e, iha loja sira seluk hanesan W-Four Audian kleur ona la uza ona plástiku no kompradór tenke lori lasik embalajen amigável ho ambiente ka bainhira laiha sosa saku verde sira ne’ebé loja prepara ho folin hahú $0,10 to’o $0,50.

Nune’e mós, iha estabelesementu fatin hahan ne’ebé lokaliza iha Kampu Alor, Dili mós la uza ona plástiku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here