Xefe Estadu Maiór F-FDTL, Majór Jenerál Lere Anan Timur, lansa livru kona-ba dezenvolvimentu F-FDTL iha aniversariu transformasaun FALINTIL ba F-FDTL ba dala-20 iha Kuartel Jeral F-FDTL, Fatuhada, Dili. Imajen Tatoli/Antonio Goncalves

DILI, 02 fevereiru 2021 (TATOLI)- Komandu FALINTIL-Forsa Defeza Timor-Leste (F-FDTL), tersa ne’e, selebra aniversáriu transformasaun FALINTIL ba Forsa Defeza Timor-Leste (F-FDTL) ba dala-20 (02 fevereiru 2001-2021) ho atividade lansamentu livru temátiku tolu kona-ba sakrifisiu luta FALINTIL nian.

Livru tolu ne’e ho títulu, “Haklehat Hahihak no Rasiskak Hakat Timor-Leste Hari Otas Moris nian To’o Agora Ne’e Dadaun”, hosi eskritór, Kapitaun Oracio dos Santos, “Funu & Ai-han FALINTIL”, hakerek hosi Alípio Seixas Henriques, no livru “Baze Apoiu” (Rekuperasaun Memória Istória Luta Ba Periodu 1976- 1978) hakerek hosi Domingos Savio atuál Prezidente Autoridade Munisípiu Lautem.

Notísia Relevante : Prezidente Repúblika husu F-FDTL prepara ba dezafiu foun

Livru ne’e lansa direita hosi Xefe Estadu Majór Jenerál F-FDTL, Majór Jenerál, Lere Anan Timur no Presidente Parlamentu Nasionál, Aniceto Longuinhos Guterres, iha Kuartél Jenerál F-FDTL, Fatuhada, Dili, ho tema komemorasaun “FALINTIL-FDTL SARAN-AAN BA RAI NO BA SOBERANIA NASIONÁL”.

Serimónia lansamentu hahú ho orasaun agradesimentu ne’ebé hala’o hosi Padre Kapelaun F-FDTL, Tenente Rui Filomeno de Jesus Gomes.

Xefe Estadu Majór Jenerál F-FDTL, Majór Jenerál, Lere Anan Timur, hateten livru ne’e seidauk kompletu, maibé bele konta ona prosesu ezisténsia luta FALINTIL nian ne’ebé lidera hosi Komandante Ein-Xefe FALINTIL, Kay Rala Xanana Gusmão hamutuk ho eroi veteranu sira ne’ebé hahú luta hafoin baze apoiu rahun no kontinua luta to’o manan funu, no transforma FALINTIL ba F-FDTL.

Lere dehan, F-FDTL sei la haluha sakrifisiu luta ne’ebé Komanda hosi Kay Rala Xanana Gusmão fó korajen no motiva FALINTIL iha tempu susar durante funu tinan 24.

Notísia Relevante : Lere promete eleva kapasidade institusionál no moris di’ak membru F-FDTL sira

Livru ne’e sai mós mata dalan ba jerasaun foun bele lee no aprende hatene luta FALINTIL nian no labele inventa istória FALINTIL.

“Livru ne’e hakerek hanesan memória para aban-bainrua ema tuir mai labele inventa fali, porezemplu kona-ba ezisténsia FALINTIL nian, ami fó agradesimentu primeiru ba ita nia Maun Boot Xanana Gusmão nu’udar Komandante Ein-Xefe FALINTIL ninia kestaun morál hamutuk nafatin ho forsa FALINTIL tantu iha ai-laran to’o mai akantonamentu,”  Lere  hateten iha  nia diskursu.

Livru ne’ebé hakerek lori prosesu tinan sia liu, tanba eskritór sira tenke halo peskiza hale’u Timor buka sasin sira ne’ebé moris hodi hakerek istória loloos bazeia faktu no akontesimentu.

Nia dehan, veteranu barak komesa katuas ona, tanba nia agradese ba ekipa istória nia vontade hodi rekolla istória sai informasaun ba futuru Timor-Leste.

“Livru ne’e dala ruma hakanek balun ninia sensibilidade no sira nia fuan, mais pasiénsia ne’e istória ita tenke konta,” Lere hateten.

Lere hatutan, livru ne’e hakerek mós istória moruk aat balun ne’ebé komandante no soldadu FALINTIL balun hasoru iha funu.

Komandante Lere hatutan, iha funu alende terus, FALINTIL sira enfrenta mós problema menus ai-han halo sira buka esforsu rekolla ai-han fuik sira hodi transforma sai ai-han hodi bele fó moris ba sira kontinua luta.

Iha fatin hanesan, reprezentante eskritór livru, Kapitaun Oracio dos Santos dehan, livru ne’e hakerek kona-ba istória sira ne’ebé hahú akontese durante luta FALINTIL nian to’o prosesu transformasaun F-FDTL iha Aileu iha tinan 2001.

Nia konsidera livru ne’ebé sira hakerek sei falta buat barak, no sira espera ema hirak ne’ebé koñese di’ak istória bainhira lee livru ne’e bele korrije no hato’o sujestaun di’ak ba ekipa hodi hakerek ho di’ak liután.

Kapitaun Oracio hatutan, foin primeira vés maka sira hakerek livru ne’e hodi buka hatene kle’an FALINTIL nia istória hodi bele tulun leitór sira bele hatene relasaun istória FALINTIL no F-FDTL.

Livru ne’e mós ko’alia kona-ba biografia Komandante Taur Matan Ruak no Komandante Lere Anan Timor nia mandatu iha prosesu kriasaun FALINTIL to’o transformasaun FALINTIL ba F-FDTL  iha Aileu tinan 2001.

“Livru ne’e ami introdús Jenerál Taur Matan Ruak no Jenerál Lere Anan Timor no komandante sira balun ne’ebé konsidera elementu dahuluk lidera Instituisaun F-FDTL,” nia hateten.

Durante tinan 20, F-FDTL hetan ona progresu di’ak iha parte rekursu umanu, dezenvolvimentu infraestrutura no presiza hadi’a nafatin Instituisaun F-FDTL hodi bele prepara nia rekursu hola parte iha misaun ONU tuir vizaun estratéjika dezenvolvimentu forsa nian.

Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here