Embaixador Japaun Iha Timor-Leste, Masami Kinefuchi. Imajen /Embaixada Japaun iha TL

DILI, 02 fevreiru 2021 (TATOLI)–Embaixada Japaun iha Timor-Leste apoiu osan  rihun $90-resin hodi dada bee-moos ba komunidade Suku Coliate-Leotelo, Postu Administrativu Hatulia, Munisípiu Ermera.

Embaixadór Japaun iha Timor-Leste, Masami Kinefuchi, hateten apoiu orsamentu rihun $90-resin  ne’e atu fornese bee-moos ba komunidade iha area remotas.

“Projetu ne’e kanaliza bee-moos hosi bee-matan ba komunidade sira nia fatin,” Embaixadór Masami Kinefuchi hateten, tersa ne’e, bainhira halo asinatura ba projetu GGP (Programa Fundu Asistensia Seguransa Umanitária ba Komunidade sira) iha  Embaixada Japaun nian iha Dili.

Notísia Relevante : Japaun apoiu $90,900 harii postu saúde Souro

Nia dehan, iha projetu ne’e sei prepara tanke unidade ida, tanke tolu (totalidade kapasidade rezervatóriu  mak 2,550L) no torneira públiku 18 ho kanu distribuisaun hamutuk metru 6,581.

Projetu  ne’e sei ezekuta hosi ONG lokal Alfa Star no ONG ne’e mak hetan oportunidade hodi kaer projetu ne’e.

“Ha’u apresia katak ita-boot sira servisu maka’as tebes hodi prepara projetu ida-ne’e maibé ida-ne’e foin mak pontu partida ida, ita-boot sira nia esforsu adisionál sei presiza tebes hodi garante sistema konstrusaun fornesimentu bee-moos ne’e sei remata duni tuir planu,” Embaixadór Masami Kinefuchi afirma.

Iha fatin hanesan director Alfa Star, Alberto Emilio hateten, projetu ne’e sira mak kaer no importante tebes ba komunidade sira nia vida tanba komunidade sira iha area remota tinan barak la asesu ba bee-moos.

“Projetu ne’e implementa ona ba oin komunidade sira iha parte ne’ebá sei asesu hotu ona ba bee-moos hodi utiliza ba nesesidade loro-loron nian,” Alberto Emilio hateten.

Nia haktuir, projetu ne’e sei fornese bee ba komunidade uma-kain hamutuk 136 resin no iha fulan oin implementa ona hodi  koordena ho parte Diresaun Bee-Moos Ermera no autoridade lokál iha fatin ne’ebá.

Definisaun no alvu projetu GGP

Liuhosi portal embaixada ofisial Embaixada Japaun nian iha Timor-Leste (timor-leste.emb-japan.go.jp, relata kina-ba saida mak GGP/KUSANONE “Programa Fundu Asisténsia Seguransa Umanitária ba Komunidade sira” (GGP/KUSANONE) iha objetivu atu atinzi dezenvolvimentu ekonomia no sosiál iha nasaun sira ne’ebé foin hahú dezenvolvimentu bazeia ba konseitu “Seguransa Umanu”, hodi fornese asisténsia fundu nesesáriu atu benefisia komunidade sira iha “nivel baze”. 2. BENEFISIARIU NE’EBÉ ELIGIVEL Organizasaun Naun-Governmental (ONG), Organizasaun sira laho-lukru (NPOs), ONG Internasionál, Governu Lokál, Instituisaun Akadémiku no Instituisaun Saúde iha Timor-Leste.

Area projetu fundu GGP/KUSANONE autoriza de’it ba konstrusaun fíziku/reabilitasaun, sosa ekipamentu no seluk tan. Relasiona ho komponente sira ba kapasitasaun, fundu GGP bele autoriza atu uza karik nesesita tebes, ezemplu, treinamentu ba membru GMF no ba komunidade sira ligadu ho projetu konstrusaun bee-moos.

Iha area edukasaun, Eskola Primária, Pre-Sekundária, Sekundária, Eskola Téknika Vokasionál, Edukasaun ba ema ho defisiénsia ka sentru edukasaun inkluzivu no seluk tan.

Iha area Saúde, sentru saúde, postu saúde, ospitál, sentru reabilitasaun no seluk tan. Area bee-moos no saneamentu kona-ba konstrusaun abastesimentu sistema bee-moos iha area rural no seluk tan.

Projetu fundu GGP/KUSANONE foku mós ba protesaun sosiál ba komunidade vulneravel sira, bem-star no asisténsia sosiál sira hanesan, protesaun sivíl, ambulánsia no seluk tan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here