Diretora Jerál Prestasaun Servisu Saúde, Odete da Silva Viegas. Imajen Tatoli/Egas Cristovão

DILI, 02 fevereiru 2021 (TATOLI)—Ministériu Saúde (MS) liuhosi Koordenadora Jerál Komisaun Nasionál Prevensaun COVID-19, Odete da Silva Viegas fó sai katak, Governu hahú aplika kuarentena obrigatóriu iha loron 3 fevereiru.

Odete fó sai data implementasaun kuarentena obrigatóriu ne’e liuhosi konferénsia imprensa ne’ebé hala’o iha salaun Ministériu Saúde, Caicoli, tersa (02/02).

Notísia Relevante:EE da-sanulu: Governu deside halakon auto-kuarentena, exeptu diplomata

“Hakarak hato’o informasaun ba públiku kona-bá regra Estadu Emerjénsia ba da-sanulu nian katak, sidadaun hotu-hotu tantu nasionál no internasionál sei submete ba kuarentena obrgatóriu, eseptu nível diplomata sira,” koordenadora ne’e informa.

Kona-bá fatin kuarentena obrigatóriu, Ministériu Saúde liuhosi ekipa vizilánsia prepara ona apartamentu ka otél própriu.

Odete sita Dekretu Governu númeru 3 2021/29  janeiru kona-bá ezekusaun Estadu Emrejénsia ba da-sanulu ne’ebé Prezidente Repúblika dekreta mós artigu kona-bá ema sira ne’ebé tama mai sei aplika kuarentena obrigatóriu eseptu ema sira ho pasaporte diplomátiku mak bele hetan autorizasaun  hodi hela iha autokuarentena.

Kona-bá ema sira ne’ebé hetan ona aprovasaun hodi halo autokuarentena antes loron 2 fevereiru, hahú loron 3 ba oin tenke submete ba regra Estadu Emerjénsia da-sanulu atu kumpre kuarentena obrigatóriu.

Nia mós husu nafatin ba públiku atu informa ba autoridade kompetente bainhira hetan kualkér sidadaun ne’ebé hakat liu fronteira Terrestre ho ilegalmente, tanba oras ne’e daudaun kazu pozitivu COVID-19 aumenta ba beibeik.

EE faze da-sanulu ba loron-30, abranje territóriu nasionál tomak no vigora iha tuku 00:00 loron 2 fevereiru to’o tuku 23:59 loron 3 marsu 2021.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here