Karreta segundo mão. Imajen/Espesiál

DILI, 01 fevreiru 2021(TATOLI)–Vise-Prezidente Kámara Komersiu Indústria Timor-Leste (CCI-TL, sigla portugés) ne’ebé trata asuntu transporte, Fernando da Silva, hateten nia parte apoia tebes desizaun Autoridade Aduaneira (AA)/Alfándega hodi bandu karreta segundo mão sira labele tama tan mai Timor-Leste.

Kestaun ne’e mensiona iha dekretu-lei 30/2011, kona-ba kondisaun no prosedimentu observa relativa importasaun veíkulu.

Notísia relevante: Alfándega alerta karreta produsaun liu tinan lima labele importa

Nia husu Alfándega atu rigór iha implementasaun dekretu-lei no kontrolu, nune’e minimiza karreta segundu mão labele tama mai Timor-Leste.

“Karreta sira ne’ebé maka produsaun liu tinan-lima labele tama tan mai ita-nia rai. Ha’u hanoin ninia implementasaun no kontrolu, Alfandega tenke rigór,” Vise-Prezidente CCI-TL dehan iha Portu Dili , segunda ne’e.

Nia nota, durante ne’e iha kapitál Dili, karreta segundo mão  maka domina, tanba ne’e presiza halo kontrolu atu hahú redús.

“Ita-nia estrada ne’ebé maka kloot, ita haree iha Dili karreta segundo mão maka  halo nakonu estrada. Ita-nia nasaun ne’e la’ós fatin lixu atu karreta ne’ebé karreta uzadu hotu bele importa mai. Karik bele halo tan lei hodi  hodi regula ida-ne’e,” nia akresenta.

Jornalista: Natalino Costa  

Editora: Julia Chatarina

HAKEREK NO HATÁN

Please enter your comment!
Please enter your name here