Presidente CI, Virgílio da Silva Guterres. Imajen TATOLI/Egas Cristovão

DILI, 01 fevereiru 2020 (TATOLI)–Prezidente Conselho de Imprensa (CI), Virgílio da Silva, rekomenda kestaun importante balun liga ho serbisu redasaun ba estrutura foun Konsellu Diretivu TATOLI-Agência Noticiosa de Timor-Leste, Institutu Públiku (IP) hafoin simu pose.

Ministru Asuntu Parlamentár no Komunikasaun Sosiál, Francisco Martins Pereira Jerónimo, fó pose ba Prezidente Konsellu Diretivu Agência TATOLI, Manuel Pinto, Vise-Prezidente Asuntu Mídia no Jornalístiku, Xisto Freitas Piedade no Vise-Prezidente Asuntu Administrasaun no Finansa, Olandino da Costa.

“Dahuluk, TATOLI tenke iha ekipa editoriál ne’ebé forte, katak ho lideransa Prezidente foun ekipa editoriál tenke iha kapasidade atu halo analiza, identifika isu saida de’it maka atu foti, liuliu asuntu sira ne’ebé mai husi Governu no Parlamentu, tanba povu presiza hein saida maka ita-nia membru Governu sira halo loron-loron,” Prezidente CI dehan ba Agência TATOLI bainhira partisipa iha seremónia simu pose Konsellu Diretivu, iha salaun Prezidénsia Konsellu Ministru (PCM, sigla portugés) iha Palásiu Governu, segunda ne’e.

Notísia relevante: MAPKOMS fó pose ba Konsellu Diretivu Agência TATOLI

Kestaun seluk nia rekomenda ba mídia estatál ne’e atu tau konsiderasaun maka tenke kontribui atu dezenvolve lian tetun.

“Ekipa redasaun ba lian tenke serbisu maka’as, atu nune’e TATOLI nia notísia lian tetun ajuda dezenvolve lian tetun sai referénsia ba mídia sira seluk. Ita bele dehan prodús lian ho kualidade jornalíztika nian,” nia akresenta.

Biban ne’e, Prezidente CI hato’o parabéns ba estrutura foun TATOLI ne’ebé foin simu pose no espera bele lori espíritu no kreatividade foun.

Daudaun Agência TATOLI iha ekipa hamutuk 44, inklui Konsellu Diretivu no ekipa redasaun Agência TATOLI kompostu husi ema na’in-26, ne’ebé husi númeru ne’e iha jornalista na’in-10 ne’ebé kobre área hotu no editór na’in-haat.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here