Komandu Polísia Eskuadra Don Aleixo, Comoro, Dili, halo hela investigasaun ba kazu hana katuas nia matan ne’ebé akontese iha área Tasi-Tolu, Dili. Imajen/PNTL

DILI, 01 fevereiru 2021 (TATOLI)-Komandu Polísia Eskuadra Don Aleixo, Comoro, Dili, halo hela investigasaun ba kazu hana katuas ida nia matan karuk ne’ebé akontese iha área Tasi-Tolu, Dili, sábadu (30/01).

Segundu Komandante PNTL Munisípiu Dili, Superintendente Asistente  Euclides Belo, informa kazu ne’e envolve autór na’in-tolu; feto na’in-ida no mane rua.

Euclides dehan, ekipa investigasaun kriminál PNTL halo ona identifikasaun iha terrenu, deskonfia ema na’i- tolu ne’ebé envolve iha kazu konsidera nu’udar vítima no suspeitu hotu, tanba sira maka hamosu konflitu krime ba malu.

“Ita loke ona prosesu investigasaun kazu krime ne’e, sira na’in-tolu ne’ebé sai sujeitu ba konflitu ne’e hotu. Ita konsidera sira na’in-tolu hanesan suspeitu hotu no vítima hotu. Agora ita hein prosesu investigasaun sei haree se mak halo uluk asaun, tanba vítima ida rama tama matan ne’e konsidera vítima no suspeitu hotu,” Euclides Belo hateten jornalista iha Komandu PNTL, Caicoli, Dili, segunda ne’e.

Euclides dehan, PNTL seidauk bele fó sai autór na’in tolu nia identidade, tanba prosesu investigasaun sei la’o hela.

PNTL mós rekolla ona informasaun iha terrenu hodi buka hatene kauza problema ne’ebé hamosu konflitu to’o sira lori rama hana katuas ida nia matan no vítima ida feto ne’e mós sofre kanek maka’as iha nia ulun tanba hetan baku.

Vítima na’in tolu ne’ebé hamosu problema konfrontu ne’e, daudaun  hala’o hela tratamentu saúde iha Ospitál Nasionál Guido Valadares (HNGV).

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here