Deputada Bankada CNRT. Virgínia Ana Belo. Imajen/Cipriano Colo.

DILI, 01 fevereiru 2021 (TATOLI)–Reprezentante povu iha uma fukun Parlamentu Nasionál (PN) preokupa ho saláriu ba funsionáriu sira atraza tanba tama ona ba fulan-fevereiru.

Notísia Relevante: Ajustamentu kódigu atividade, saláriu funsionáriu janeiru atrazu

“Ha’u atu husu tanbasá mak saláriu ba funsionáriu seidauk tama ne’e. Sá data mak sira tenke simu sira-nia direitu. Ema sira-ne’e presta ona servisu fulan ida maibé tanbasá mak sira-nia saláriu laiha,” Membru Parlamentu Nasionál, Deputada Virgínia Ana Belo, levanta liuhosi plenária, segunda ne’e.

Nia dehan, funsionáriu barak tebes kestiona makaas kona-ba saláriu ne’ebé atraza ne’e. Nia levanta kestaun ne’e tanba simu mensajen hosi funsionáriu sira hosi Ministériu Saúde, Ministériu Justisa, no profesór sira balun.

“Problema loloos iha-ne’ebé. Labele promete dehan ajustamentu kódigu. Favór ami husu ho haraik-aan ba ita boot sira,” Deputada Bankada CNRT ne’e hateten.

Nia husu Governu liuhosi Ministériu Finansa atu fó esplikasaun klaru kona-ba saláriu ne’ebé atrazu.

Nia afirma, oras ne’e funsionáriu barak tebes mak seidauk simu saláriu, funsionáriu balun tama no balun la tama, maske servisu iha instituisan ida.

“Problema loloos iha-ne’ebé, halo favór halo esplikasaun,” Deputada Virgínia Ana Belo lamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here