Primeiru-Ministru, Taur Matan Ruak konvoka enkontro Embaixadór Xina iha Timor-Leste, Xiao Jianguo. iha Palásiu Governu, segunda (01/02). Imajen TATOLI/Egas Cristovão

DILI, 01 fevereiru 2021 (TATOLI)–Primeiru-Ministru (PM), Taur Matan Ruak, husu ba ajénsia no instituisaun Estadu sira hotu atu utiliza plataforma eletrónika janela únika iha atividade komersiál (esportasaun no importasaun) sira.

Pedidu ne’e Xefe Governu hato’o bainhira Ministru Finansa, Rui Augusto Gomes, informa atividade semanál Ministériu Finansa (MF).

“Ha’u hala’o enkontru semanál ho Primeiru-Ministru no iha reuniaun ne’e ha’u temi mós seremónia lansamentu ba plataforma eletrónika ne’e. Primeiru-Ministru fó orden katak ajénsia no instituisaun sira seluk ne’ebé seidauk hola parte, tenke fó tempu nune’e sira mós bele hola parte,” Ministru Rui Gomes relata hafoin ramata reuniaun ho Xefe ezekutivu iha Palásiu Governu, segunda ne’e.

Notísia relevante: Lansamentu janela únika, ajuda reforma fiskál no jestaun finansa públika

Iha sorin seluk, Diretór Jerál Autoridade Aduaneira (AA)/Alfándega, José António Fátima Abílio, haktuir iha dezembru 2019 Governu liuhosi AA konklui programa ba implementasaun Automated System for Customs Data (ASYCUDA) World hodi tama ba tranzasaun janela únika liuhosi akordu asina entre MF ho United Nation Conference on Trade and Development (UNTACD) iha setembru 2019.

“Iha tinan 2020 Autoridade Aduaneira hahú halo aprosimasaun ba ajénsia Governu sira seluk no halo promosaun ba sistema janela únika ne’e rasik hodi hahú identifika no dezenvolve modul ba nesesidade instituisaun nian, nune’e bele inisia implementasaun,” Diretór Jerál AA ne’e dehan.

Daudaun ne’e, AA liuhosi UNTACD konsege rekruta ona pesoál espesialista ba janela únika ida husi Áfrika, ne’ebé sei serbisu hamutuk ho AA atu dezenvolve sistema refere no bele halo mós espansaun rejionál no internasionál.

“Ba futuru husi Autoridade Aduaneira espera katak instituisaun sira bele serbisu hamutuk di’ak liután, ami mós espera katak ho lideransa sira bele motiva instituisaun relevante sira ne’ebé iha ligasaun ho implementasaun janela únika, no ba mós fasilidade komérsiu atubele serbisu hamutuk di’ak liután nune’e bele kumpre rekezitu ba komérsiu inklui redús libertasaun merkadoria,” José António tenik.

Entretantu, sistema ne’e ho intensaun ida katak nasaun sira presiza moderniza sistema alfandegáriu atubele fasilita efisiénsa iha komérsiu no mós proteje kompetetividade komersiante sira liuhosi redús kustu tranzasaun tempu no kustu seluk, inklui kontrola kargu sira tama-sai.

Jornalista: Antónia Gusmão

Editora: Julia Chatarina     

HAKEREK NO HATÁN

Please enter your comment!
Please enter your name here