António da Conceição. Imajen Tatoli/Antonio Goncalves.

DILI, 01 fevereiru 2021 (TATOLI)–Partidu Demokrátiku (PD) durante ne’e uza subvensaun públika ne’ebé atribui hosi Komisaun Nasionál Eleisaun (CNE-sigla portugés) barak ba formasaun tanba formasaun ne’e nu’udar investimentu rekursu umanu ba futuru.

Notísia Relevante: CNE apresia relatóriu subvensaun públika hosi partidu asentu parlamentár

“Subvensaun ne’e ami ezekuta ba atividade partidu nian. PD nian imi bele haree iha sede tanba joven sira kada loron nakonu, balun tuir formasaun. Ida mak La Sama Training Center. Ami mós haruka ema ba Jogja hodi tuir formasaun lideransa. Tanba subvensaun ne’e tenke utiliza ho loloos. Ne’e hanesan investimentu rekursu umanu ba futuru,” Sekretáriu Jerál Partidu Demokrátiku (PD), António da Conceição ‘Kalohan’, hateten ba jornalista sira iha resintu Parlamentu Nasionál, segunda ne’e.

Nia hatutan, Partidu Demokratiku (PD) mós iha Grupu Feto Demokrátiku ba tuir formasaun iha Malázia.

“Intermu preparasaun rekursu umanu ami halo makaas no ami-nian halo retiru polítika ne’ebé ami halo iha Maliana,” nia dehan.

Nia informa, oras ne’e relatóriu subvensaun públika ne’e falta de’it munisípiu balun.

“Kuaze kada fulan ami sempre iha atividade. Uniku só PD mak uza osan ne’e harii sede uma mutin boot iha Kolmera. Ami mós harii ida iha Likisá,” nia hateten. 

Sekretáriu Jerál PD ne’e haruka karta ba terras no propriedade kona-ba atu harii tán sede munisipál iha Ermera, Covalima no Lautém.

“Ami kada deputadu ne’e hetan rihun $90, posivelmente kadeira lima ne’e osan rihun $400 resin,” Kalohan dehan.

Nia hatutan, ezisténsia partidu ne’e iha tanba atu serbí maibé tenke prepara juventude ne’ebé kualifikada lidera partidu ba oin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here