Lansamentu sistema janela únika, iha salaun MF, Aitarak-laran, Dili, Segunda (01/02). Imajen TATOLI/Antónia Gusmão

DILI, 01 fevereiru 2021 (TATOLI)–Governu liuhosi Ministériu Finansa (MF) hamutuk ho Autoridade Aduaneira (AA)/Alfándega no TradeInvest, halo ona lansamentu ba plataforma eletrónika hanaran janela únika ka janela ida de’it.

Janela únika uza Automated System for Customs Date (ASYCUDA) World ne’ebé hanesan sistema kumputarizadu.

Ministru Koordenadór Asuntu Ekonómiku (MKAE), Joaquim Amaral, konsidera sistema ne’e importante tebes ajuda Governu Governu hadi’a ambiente negósiu.

“Ita asiste tan faze importante ida iha ita-nia sistema administrasaun Estadu, iha situasaun ne’ebé agora Estadu iha faze atu rekupera ekonomia, esforsu hotu halo atubele hadi’a ita-nia ambiente negósiu,” Ministru Joaquim, hateten iha ámbitu seremónia lansamentu sistema, ne’ebé hala’o iha salaun MF, Aitarak-laran, segunda ne’e.

Notísia relevante: Lansamentu janela únika, ajuda reforma fiskál no jestaun finansa públika

Nia konsidera lansamentu sistema ne’e oportunu iha momentu Estadu presiza parseria, tanba ne’e presiza hadi’a ambiente negósiu hola parte iha reforma jestaun finansa.

Tuir governante ne’e, parte importante maka hadi’a sistema rejistrasaun halo sai janela ida de’it hanesan plataforma ida-ne’ebé Timor-Leste hetan ajuda husi United Nation Conference on Trade and Development (UNTACD).

“Liuhosi sistema ne’e, Timor-Leste bele hadi’a sistema ambiente negósiu atu nune’e bele fasilita prosesu rejistasaun merkadoria sira ne’ebé tama sai husi Alfándega no liga ho ajénsia sira ne’ebé ninia funsaun atu promove ambiente negósiu,” Joaquim esplika.

Hanesan Ministru ne’ebé koordena asuntu ekónomiku, nia parte apresia tanba hahú husi TradeInvest ne’ebé hanesan ajénsia ne’ebé promove esportasaun ho investimentu, hahú simplifika liuhosi dijitaliza sistema atu integra iha sistema mundiál.

“Ha’u enkoraja ajénsia sira-ne’ebé mak tutela ba MKAE atu adere ba sistema ne’e atu fasilita sistema rejistrasaun, atu ita-nia servisu iha ambiente negósiu bele lalais liután,” nia hatutan

Biban ne’e, Ministru Joaquim louva MF no AA, hein katak implementasaun sistema sei la’o ho efisiente, efetivu no fó rezultadu pozitivu.

“Importante hakarak haree rezultadu, loos duni iha reklamasaun barak iha sistema atendimentu Autoridade Aduaneira, tanba ne’e ha’u hein ho lansamentu plataforma eletrónika ne’e fó mensájen klaru ba mundu emprezariál, katak kompromete ho sériu atu hadi’a atendimentu, atu nune’e bele harii ambiente negósiu di’ak ba ema hotu tantu nasionál no internasionál,” nia espera.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here