Ministru Asuntu Parlamentár no Komunikasaun Sosiál, Francisco Martins da Costa Jerónimo, akompaña husi Sekretáriu Estadu Komunikasaun Sosiál, Merício Juvinal dos Reis ‘Akara’ fó pose ba Konsellu Diretivu Agência TATOLI, iha salaun PCM, Palásiu Governu, segunda (01/02). Imajen TATOLI/António Gonçalves

DILI, 01 fevereiru 2020 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, husu estrutura foun TATOLI-Agência Noticiosa de Timor-Leste, Institutu Públiku (I.P) atu asume responsabilidade ho másimu hodi dezenvolve instituisaun sai di’ak liután.

Governante ne’e hato’o mensajen ne’e, iha ámbitu pose ba Konsellu Diretivu Agência TATOLI, kompostu husi Prezidente, Manuel Pinto, Vise-Prezidente Asuntu Mídia no Jornalístiku, Xisto Freitas Piedade no Vise-Prezidente Asuntu Administrasaun no Finansa, Olandino da Costa, ba mandatu tinan-haat.

“Ha’u husu ba estrutura TATOLI ne’ebé maka kompleta ona atu asume responsablidade ho másimu, halo didi’ak knaar ne’ebé ita-bo’ot sira hetan, tanba konfiansa ne’ebé hetan atu jere halo buat ne’ebé sala sai di’ak no di’ak sai di’ak liu, se kuandu la atinje ida-ne’e, ha’u hanoin  pose ne’ebé ita simu ohin ne’e laiha valór,” Ministru Francisco hateten iha salaun Prezidénsia Konsellu Ministru, iha Palásiu Governu, segunda ne’e.

Notísia relevante: MAPKOMS fó pose ba Konsellu Diretivu Agência TATOLI

Biban ne’e, nia kontinua suporta no fó konfiansa ba estrutura foun atu hala’o serbisu ho di’ak.

Ministru Asuntu Parlamentár no Komunikasaun Sosiál, Francisco Martins da Costa Jerónimo, akompaña husi Sekretaria Estadu Komunikasaun Sosiál, Merício Juvinal dos Reis ‘Akara’ fó pose ba Konsellu Diretivu Agência TATOLI, iha salaun PCM, Palásiu Governu, segunda (01/02). Imajen TATOLI/António Gonçalves

“Ha’u husu atu serbisu hamutuk hodi dezenvolve TATOLI sai di’ak liután, notísia tenke kualidade hodi fó esperansa ba povu,” Ministru hameno.

Nia mós husu atu mídia estatál ne’e tenke sai úniku husi mídia hotu ne’ebé eziste.

“Ha’u husu notísia TATOLI tenke sai uluk molok mídia sira seluk sai no labele kopia fali mídia sira seluk nia notísia, tanba kuandu hanesan ne’e la’ós ona TATOLI,” nia subliña.

Kriasaun Agência TATOLI bazeia ba dekretu-lei  númeru 21/2017, 24 maiu, hanesan ema koletiva ne’ebé iha direitu públiku ho natureza institutu públiku.

Ezisténsia Agência TATOLI mak sai fontes informasaun ofisiál Estadu Timor-Leste ne’ebé iha kapasidade no kbiit elabora informasaun ba públiku iha eskala nasionál, rejionál no internasionál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here