Labarik sira halimar no halo hela ezersísiu iha Jardin Colmera ne’ebé Governu prepara ekipamentus ba ezersísu nian atu motiva labarik sira no sosiedade ida ne’e sai sosiedade saudável. Imajen Tatoli/Antonio Goncalves.

DILI, 01 fevereiru 2021 (TATOLI)—Xefe Programa no Polítika Peskiza KNDL, José Correia da Piedade, hateten atu labale akontese labarik sira moris iha dalan ninin, presiza família liuliu inan-aman sira tenke dignifika labarik sira-nia direitu hodi akompaña oan sira-nia atividade loro-loron ba fasilidade ne’ebé mak Governu oferese ona.

Notísia Relevante: Iha Timor-Leste laiha “Labarik Dalan Ninin”

“Família ka inan-aman mak tane aas, dignifika no respeita ita-nia labarik sira-nia direitu. Inan-aman sira mak tenke akompãna oan sira-nia kresimentu iha atividade eskola liuhosi fasilide eskola nian ne’ebé Governu oferese ona,” Xefe Programa no Polítika Peskiza ba Komisaun Nasionál Direitu Labarik (KNDL), José Corera da Peidade, ba Agência TATOLI iha nia knaar fatin, Caicoli, Dili, segunda ne’e.

Entretantu, nia hatutan, durante Departamentu Programa no Polítika Peskiza ne’e estabelese, sira seidauk halo peskiza kona-ba asuntu violasaun seksuál hasoru labarik sira tanba alokasaun orsamentu durante ne’e laiha.

Maibé, nia informa, liuhosi sira-nia parseria sira ne’e sira halo atividade kampañia nasionál kona-ba ‘labele sosa hosi labarik sira no hapara violénsia hasoru labarik sira’, ida-ne’e sira halo tanba liuhosi konsensializasaun atividade ba públiku no iha munisípiu sira hotu.

Nia dehan, atividade peskiza mak seidauk halo maibé atividade divulgasaun informasaun kona-ba violénsia no labarik sosa hosi labarik sira ne’e, Komisaun Nasionál Direitu Labarik kontinua hala’o to’o ohin loron.

“Atividade forsadu sira-ne’ebé mak labarik sira halo iha dalan ninin, ha’u husu ba inan-aman sira atu nafatin fó atensaun ba oan sira no akompañia ba sira-nia atividade tomak. Ha’u rekomenda ba inan-aman sira katak labele husik oan sira halo grupu iha públiku,” nia rekomenda.

Iha biban ne’e, liuhosi KNDL nia hato’o ba manorin na’in sira atu akompaña no fó korajen nafatin ba estudante sira atu respeita regra hosi protokolu sira kona-ba surtu COVID-19 nian, presiza aumenta labarik sira-nia koñesementu no hakbesik labarik sira ba programa “Eskola Ba Uma” ne’ebé mak Governu estabelese ona liuhosi Minstériu Edukasaun nian.

“Dezenvolvimentu Estadu ida-ne’e, Estadu tenke investe makaas ba labarik sira tanba labarik sira nu’udar komponente importante ida ba Estadu ida-ne’e ninian no atu sai kontinuasaun ba dezenvolvimentu nasaun ne’e nian. Harii Estadu ida-ne’e mak labarik sira. Hakarak ka lakohi, Estadu tenke investe ba labarik sira iha aspetu hotu-hotu tantu edukasaun, saúde, dezenvolvimentu, sosiál no aspetu hirak ne’ebé mak kontribui ba labarik sira-nia dezenvolvimentu nian tanba futuru iha labarik sira-nia liman,” nia esplika.

Notísia Relevante: 2017-2020, CNCTI seidauk halo peskiza ba traballu infantil

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here