Ministru Justisa, Manuel Cárceres da Costa. Imajen Tatoli/António Gonalves.

DILI, 01 fevereiru 2021 (TATOLI)–Governu liuhosi Ministériu Justisa (MJ) husu autorizasaun ba Parlamentu Nasionál ho intensaun aselera prosesu sívil sira-ne’ebé pendente iha tribunál.

Ministru Justisa, Manuel da Costa Cárceres, hateten inisiativa Governu husu autorizasaun hosi Parlamentu Nasionál atu halo alterasaun ba artigu balun (285-388) Kódigu Prosesu Sívil (CPC, sigla portugés) tanba haree ba análiza valór estatístika ne’ebé Tribunál Rrkursu fornese ba Governu.

“Iha estatístika iha kazu pendente hahú hosi 2016, 2017, 2018, hasai konkluzaun katak prosesu sívil mak barak liu pendente iha tribunál tanba ida-ne’e Governu intende katak presiza avansa agora hodi halo alterasaun ba faze saneamentu,” Manuel da Costa Cárceres esplika liuhosi faze jeneralidade iha plenária PN, segunda ne’e.

Tanba, tuir nia, únika Kódigu Prosesu Sívil Timor-Leste nian mak tentativa konsiliasaun atu hamenus komplesidade iha faze saneamentu nune’e juis sira bele halais prosesu pendente sira.

Nia hatutan, prepózitu ba inisiativa lejizlativa refere atu konfere maiór hodi flesibiliza iha faze saneamentu.

“Alterasaun ida-ne’e ita hein katak ita-nia justisa sei funsiona ho efikásia no mais efisiente nune’e bele rezolve daudaun kazu pendente sira,” nia dehan.

Entretantu, Prezidente Komisaun A (Justisa no Konstitusionál), Deputadu Joaquim dos Santos, hateten bainhira parlamentu aprova ona proposta-lei ne’e iha finál globál entaun Governu sei halo alterasaun durante loron 180.

“Se durante loron 180 ne’e mak la konsege entaun kaduka,” nia dehan. 

Hatán ba preokupasaun ne’e Ministru Justisa Manuel da Costa Cárceres, hateten artigu rua ne’e altera lalais de’it.

“Fulan neen (6) kedas ne’e ami sei konklui, ne’ebé lalais de’it,” Ministru Cárceres akresenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here