Vise-Ministru António Guterres inaugura terseiru síklu iha Eskola Ensinu Báziku São Carlos Borromeu Aimeti Laran Manleuana Dili, segunda (01/02). Imajen/Tomé Amado.

DILI, 01 fevereiru 2021 (TATOLI)—Eskola Ensinu Báziku São Carlos Borromeu iha Aimeti Laran Manleuana Dili, ofisialmente estabelese tan terseiru síklu ne’ebé inaugura hosi Vise Ministru Edukasaun Juventude no Desportu (MEJD), António Guterres iha loron 1 fevereiru ho nia prosesu aprendizazen sei hahú iha loron 2 fevereiru 2021.

António Guterres konsidera ida ne’e hanesan orgullu bo’ot ba MEJD tanba loke tan espasu ba labarik Timoroan sira atu bele kontinua sira-nia estudu.

“Ha’u apresia ho fundasaun Carlos Borromeu tanba bele fasilita Timoroan sira atu hetan edukasaun adekuadu,” Governante ne’e fó apresiasaun iha serimónia inaugurasaun terseiru síklu.

Nia dehan, maski kongregasaun ne’e hari’i iha Indonézia, maibé hanesan bibi-atan di’ak, sira prontu fahe matenek ba ema seluk liuliu atu Timoroan sira hetan edukasaun ne’ebé di’ak.

Iha fatin hanesan, koordenadora eskola madre Imaculada CB, hateten estabelesimentu terseiru síkulu ne’e sei hahú ho sétimu anu periúdu dahuluk iha tinan ne’e ho sala-de-aula rua ne’ebé sei utiliza ba estudante na’in 72, no sala-de-aula ida atu instala komputadór unidade 37.

“Ami simu ona estudante no loloos prosesu aprendizazen hahú ohin, maibé ita foin mak halo abertura no inaugurasaun ba sala-de-aula, entaun aban foin hahú,” madre Imaculada hateten.

Koordenadora ne’e esplika, totál estudante iha eskola ensinu báziku primeiru to’o terseiru síklu hamutuk na’in 497.

“Husi númeru ne’e primeiru no segundu síklu iha na’in 425 mane 217 no feto 423, terseiru síklu na’in 72 mane 35 no feto 37,” nia subliña.

Oras ne’e daudaun, profesór ne’ebé hanorin iha eskola ne’e hamutuk na’in 24 inklui madre na’in 3 ho estatutu kontratadu tanba fundasaun mak selu.

Koordenadora ne’e hatutan, parte eskola mós iha kontratu ho fundasaun Tara Kanita Jogjakarta  Indonézia atu oferese fomasaun ba profesór sira kona-bá metodolojia oinsá sai manorin di’ak.

“Ami iha planu formasaun ba profesór sira fixu hala’o kada tinan, no iha situasaun surtu COVID-19 ita nia maluk sira hosi Jogjakarta labele mai, maibé formasaun online la’o nafatin,” nia informa.

Madre Imaculada konsidera formasaun kontinua ba profesór sira importante tanba bele reforsa liu tan kualidade ensinu báziku São Carlos bazeia ba prinsípiu no valór fundamentu ida oinsá kuda fini di’ak ba foinsa’e sira atu hatene respeita no hadomi hodi moris tuir Jesus.

Eskola ne’e ezisti iha tinan 2000 hahú ho pré-eskolár no iha tinan 2015 harii tan ensinu báziku primeiru no segundu síklu, iha fevereiru 2021 estabeleste tan terseiru síklu.

Entretantu, kongregasaun Carlos Borromeu tama iha Timor-Leste iha tinan 1979 no nia ezisténsia tinan 42.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here