Ambiente serimónia pose ba reitór foun UNTL, João Soares Martins, iha Fakuldade Enjeñaria, Siénsia no Tekonolojia, Hera (29/01). Imajen/Egas Cristóvão

DILI, 29 janeiru 2021 (TATOLI)—Universidade Nasionál Timor Lorosa’e (UNTL) hahú estabelese iha tinan 2000, to’o ohin loron gradua ona Timoroan rihun 17.

Reitór foun UNTL, João Soares Martins, hateten hosi númeru ne’e iha na’in 16.688 mak kursu baxarelatu no linsensiatura, na’in 149 kursu pós-graduasaun no 159 iha kursu mestradu.

Notísia Relevante:Reitór foun UNTL prioritiza área siénsia, teknolojia no inovasaun

“Dezde tinan 2000 to’o ohin loron, UNTL kontribui barak ba dezenvolvimentu ita-nian país. Liuhosi nia graduadu liu rihun 16, iha ne’ebé barak liu ezérse funsaun la’ós de’it iha setór públiku, maibé iha mós seitór privadu ou ajente autónoma, papél dezempeñadu hosi UNTL determinante,” reitór iha nia diskursu, iha ámbitu serimónia posse, iha Fakuldade Enjeñaria, Siénsia no Tekonolojia, Hera (29/01).

Altu responsável universidade estatál ne’e konta tuir katak, iha faze inisiál, UNTL iha de’it fakuldade lima, maibé ohin loron iha ona fakuldade sia ho kursu baxarelatu no lisensiatura hamutuk 40, programa pós-graduasaun no peskiza ida, ho kursu pós-graduasaun no mestradu hamutuk 15.

João Martins hatutan, UNTL iha dosente liu ema 553, hosi ne’e 400 mak permanente, iha funsionáriu administrativu 447, iha ne’ebé 363 mak permanente no estudante kuaze rihun 25 mak matrikuladu.

Nia mós rekoñese katak, ho konkretizasaun UNTL nian, iha dezafiu barak ne’ebé enfrenta iha mundu dijitalizasaun no globál ne’ebé ho mudansa lalais liu.

“Ita tenke preparadu atu sai ajente metamórfoze, atu dirije mudansa, sai mós protagonista ba renovasaun. Ita labele husik transformasaun ne’e mak muda ita. Ita mak tenke muda mundu. Ita labele ta’uk atu halo mudansa no halo sala. Labele repete sala ne’ebé hanesan. Ita tenke aprende hosi ita-nia falla, atu sai forte liután”, nia enkoraja.

Reitór foun ne’e mós fiar katak, universidade ne’e liuhosi nia rekursu umanu no kapasidade institusionál sempre disponível ba autór dezenvolvimentu, inklui dezenvolvimentu ekonómiku nasaun nian.

Universidade públika ne’e estabelese iha loron 17 novembru tinan 2000 hafoin referendu iha 1999 hosi inisiativa eis-dosente Universitas Timor Timur no Politeknik Dili atu responde dezafiu no ezijénsia ne’ebé mosu iha ensinu superiór iha Timor-Leste iha tempu ukun-aan.

Estatutu UNTL eziste iha Governu Kay Rala Xanana Gusmão hanesan Primeiru-Ministru, no Ministru Edukasaun João Câncio Freitas, aprova iha Konsellu Ministru iha 25 agostu 2010, hodi hatuur iha Dekretu-Lei n.u 16/2010. Dekretu-Lei ne’e promulgadu hosi Prezidente Repúblika, José Ramos Horta, iha 12 outubru 2010, no publika ona iha Jornál Repúblika ho nia kapítulu VI artigu 62.

Jornalista: Cipriano Colo

Editóra: Maria Auxiliadora

HAKEREK NO HATÁN

Please enter your comment!
Please enter your name here