Reitór UNTL foun, Joao Soares Martins. Imajen Tatoli/Egas Cristovão

DILI, 30 janeiru 2021 (TATOLI)—Reitór foun Universidade Nasionál Timor Lorosa’e (UNTL), João Soares Martins, hetan previlejiu tanba toga ne’ebé nia uza iha serimónia pose, haruka hosi University of New South Wales (UNSW) Austrália.  

“Ha’u nia toga doutoramentu nian labele uza tanba a’at ka ladi’ak ona. Tanba ne’e, ha’u husu apoiu ba Embaixadór Austrália iha Timor-Leste, Peter Roberts no ita nia eis Embaixadór Abel Guterres, sira mak tenta ho universidade hodi haruka toga ne’e mai ha’u,” João Soares Martins, ba jornalista Agência Tatoli hafoin serimónia pose iha Fakuldade Siénsia no Teknolojia Hera, sesta (29/01).

Notísia Relevante:Reitór foun UNTL prioritiza área siénsia, teknolojia no inovasaun

Reitór foun ne’e esplika, kulturalmente bainhira eis universitáriu ida hetan previlejiu ba ninia karreira atu lidera instituisaun ensinu superior ida, normalmente tenki utiliza toga doutoramentu hosi universidade ne’ebé eis universitáriu ne’e rasik frekuenta estudu.

“Toga ne’e reitór UNSW mak haruka espesiál mai ha’u, tanba nia hatene ha’u eis estudante hosi universidade ne’ebá nian. Ha’u foti iha Ministériu Negósiu Estranjeiru no Kooperasaun (MNEK),” nia konta tuir.

Ikus liu médiku ne’e agradese ba UNSW, Embaixadór Austrália iha TL Peter Roberts no mós eis Embaixadór TL ba Austrália Abel Guterres ne’ebé ho esforsu hodi lori toga no bele uza iha serimónia importante ne’e.

Entretantu, tuir disionáriu Lian Indonézia nian hateten, xapéu ne’ebé ho nia forma kuadradu (toga), iha nia sentidu profunda katak, estudante feto no mane ne’ebé gradua ona tenke hanoin ho rasionál no halo avaliasaun ba buat hotu haree hosi aspetu oioin.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here