Diretor Nasional Servisu Hospitalar no Emerjensia HNGV, Nilton da Silva. Imajen Tatoli/Egas Cristovão

DILI, 30 janeiru 2021 (TATOLI) – Adidu timoroan ida, tinan 49, servisu iha  Migrasaun konsuladu Timor nian iha  Kupang, Timor Osidentál,  pozitivu COVID-19.

Timoroan pozitivu COVID-19 ne’e agora submete ona ba sala izolamentu Vera Cruz atu hetan kontrolu no tratamentu intensivu hosi médiku sira.

Notísia Relevante : Pozitivu COVID-19 ida iha RAEOA, MS bandu movimentu ilegál

Koordenadór Pilár VII COVID-19, Ministériu Saúde, Nilton da Silva, informa timoroan nu’udar adidu ida ne’ebé iha Migrasaun konsuladu Timor nian iha Kupang ultra pasa Pontus entradas Batugade, Munisípiu Bobonaro ho legal iha loron 15 janeiru 2021.

Iha loron ne’e kedan, Nilton hateten, ekipa liña frente submete nia ba konfinamentu obrigatóriu (kuarentena) iha Batugade hodi kumpre regra saúde públiku nian loron 14

“Liu tiha loron 12,  iha loron 27 janeiru 2021, ita nia ekipa vijilánsia pilár III servisu saúde Munisípiu Bobonaro halo teste swab ba ita-nia maluk ne’e, rezultadu teste laboratóriu fó sai iha  loron 29 janeiru 2021, hatudu katak maluk timoroan ne’e pozitivu COVID-19,’ Nilton da Silva haktuir ba jornalista sira liuhosi konferénsia imprensa, sábadu ne’e, iha Edifísiu Ministériu Saúde, Dili.

Ministériu Saúde  fó sai mós katak total kazu ne’ebé sira update iha loron 30 janeiru 2021, hatudu katak dadus kumulativu teste total 18903, hein rezultadu 166, kazu foun +1, kumulativu kazu 70, rekupera foun 1 no atuál baixa 19 (Dili 18 no RAEOA 1).

Alende hosi total kazu ne’ebé mensiona hadudu katak hosi rezultadu teste kumulativu negativu total 18667, kumulativu rekupera 51+4 55 no sira ne’ebé pasa ona loron 14 iha kuarentena 7501, kompostu hosi iha Dili 126 no munisípiu 194 total 230. Auto kuarentena Dili 186  no munisípiu na’in-hitu ho total na’in-193.

Jornalista   : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here