Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 29 janeiru 2021 (TATOLI)–Tribunál Distritál Dili (TDD) iha loron 19 janeiru liubá hato’o pedidu ba Parlamentu Nasionál (PN) atu halo suspensaun ba Deputadu António da Conceição.

Notísia Relevante: Tribunál husu PN hasai imunidade Deputadu António da Conceição

Sekretária Meza Parlamentu Nasionál, Deputada Lídia dos Santos Martins, hateten iha loron ohin Prezidente Parlamentu Nasionál aprezenta ba líder bankada sira kona-ba pedidu ida hosi tribunál atu suspende mandatu ba Deputadu António da Conceição.

“Ohin, Prezidente Parlamentu Nasionál aprezenta ba líder bankada sira kona-ba pedidu ida hosi tribunál atu suspende mandatu ba Deputadu António da Conceição,” Sekretária Meza Parlamentu Nasionál, Deputada Lídia dos Santos Martins, informa liuhosi konferénsia imprensa iha PN, sesta ne’e.

Nia dehan, Prezidente Parlamentu Nasionál haree hela pedidu ne’e hodi halo ajendamentu tanba deputadu ida atu ba hatán ka presta deklarasaun ruma plenária mak autoriza liuhosi levantamentu imunidade.

Nia haktuir, tribunál notifika Parlamentu Nasionál iha loron 19 janeiru 2021.

Portavós Parlamentu Nasionál ne’e informa, tuir planu sei ajenda dentru fevereiru no molok 08 fevereiru, iha abríl ne’e suspende mandatu deputadu refere liuhosi levantamentu imunidade maske suspensaun ne’e la’ós totál.

“Maibé, ohin Prezidente Parlamentu Nasionál hateten suspensaun ne’e la’ós totál. Suspensaun ne’e halo de’it ba loron ne’ebé mak deputadu ne’e ba presta deklarasaun iha Tribunál. Nia ba responde iha tribunál no fila-fali mai asume nafatin nia funsaun,” Deputada Bankada FRETILIN ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here