Ministra Negósiu Estranjeiru no Kooperasaun, Adaljiza Albertina Xavier Magno ho Embaxadór Uniaun Eropeia iha Timor-Leste, Andrew Jacobs bainhira halo konferensia imprensa iha salaun MNEC kona-ba dialogu politiku altu nivel, sesta 29/01/2021 . Imajen TATOLI/Antonio Goncalves

DILI, 29 janeiru 2021 (TATOLI)–Ministériu  Negósiu Estranjeiru no Kooperasaun (MNEK) Timor-Leste no Uniaun Europeia (UE) realiza diálogu polítiku altu nivel ba dala-neen liuhosi meiu virtuál, kinta ne’e.

“Reuniaun ida ne’e hala’o balansu kona-ba parseria entre Timor-Leste no Uniaun Europeia dezde diálogu ikus mak hala’o iha Dili, maiu 2019 no diskute kona-ba dezenvolvimentu xave sira iha Uniaun Europeia no Timor-Leste. Partisipante sira fó destaka ba amizade profunda no kleur mak liga parte rua ne’e bazeia ba valor komún no prinsípiu sira no reforsa kompromisu forte atu haforsa sira nia parseria iha area relasaun internasionál, polítiku, komérsiu no dezenvolvimentu,” Ministra Negósiu Estranjeiru no Kooperasaun, Adaljiza Magno, hateten liuhosi konferénsia imprensa, sesta ne’e.

Hosi diálogu ne’e asuntu lubuk ida mak sira ko’alia hanesan, adezaun Timor-Leste nian ba ASEAN, asuntu mudansa klimátika, rekuperasaun ekonómika, diversifikasaun ekonómika no seluk tan.

Nia dehan iha diálogu ne’e partisipante sira halo mós revizaun ba impaktu hosi pandemia Covid-19 iha saúde públiku no UE nia apoiu ba Timor-Leste  Euro milaun 13, mak parte ida hosi ekipa Europa nia pakote ho valor Euro milaun 120 no resposta ba Timor-Leste no rejiaun pasífiku.

Ministra Adaljiza hateten, prioridade sira hosi komisaun europeia foun foku ba akordu verde Europeia no dijitalizasaun. UE mós aprezenta sira-nia prioridade polítika sira kona-ba governasaun oseanu biodiversidade  no mudansa klimátika.

Timor-Leste no UE diskute mós kestaun sira kona-ba ekonómiku no komersiál, importante inklui planu rekuperasaun ekonómiku pos-Covid-19 sentradu iha ema sira.

“Ita mós fó atualizasaun ba kandidatura atu asesu ba Organizasaun Mundial Komérsiu (OMK). Uniaun Europeia fó benvindu ba ita nia karta intensaun ho vizaun ba akordu parseria ekonómiku provizóriu entre Uniaun Europeia no estadu pasífiku sira no hein ho espetativa Timor – Leste nia submisaun ba pedidu adezaun hamutuk ho oferta asesu ba merkadu ba parte sira hosi akordu (Fiji, Papua New Guinea, Samoa, Illa Salomão no Uniaun Europeia rasik)nia desizaun,” nia esplika.

Iha fatin hanesan, Embaixadór UE iha Timor-Leste, Andrew Jacobs, hateten iha diálogu ne’e ko’alia barak liu kona-ba kooperasaun dezenvolvimentu iha Timor-Leste.

“Ami sente haksolok iha ami nia apoiu sira ba Timor-Leste hatudu progresu di’ak. Ami mós ko’alia kona-ba esforsu no atu hadi’a jestaun finansas públika,” Andrew Jacobs hateten.

Uniaun Europeia iha nafatin kompromisu hodi apoiu Timor-Leste iha area oioin no apresia ho Timor-Leste nia susesu iha dezenvolvimentu, liuliu susesu iha luta kontra pandemia Covid-19.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here