Enkontru virtuál Uza ferramenta informátika Zoom. Imajen//Celsio Oliveira

INGLATERA, 29 janeiru 2020 (TATOLI)-Médiku timoroan sira hanesan Dr. Rui Maria de Araújo no Dra. Lídia Costa, médika timoroan ida iha Peterborough City Hospital rekomenda ba timoroan sira ne’ebé rezide iha Reinu Unidu ka UK (United Kindom) atu bele simu vasina kontra Covid-19 ne’ebé Governu Britániku daudaun ne’e halo hodi aumenta imunidade idaidak nian atu labele hetan komplikasaun oioin.

Dr. Rui Araújo rekomenda, timoroan sira ne’ebé iha rai-li’ur, hetan oportunidade di’ak para vasina di’ak liu vasina kedas tanba iha influénsia ba moris liliu iha aspetu sósiu-ekonómiku.

“Vasina ne hanesan biru. Ha’u konstuma uza liafuan simples ne’e iha Timor. Purezemplu, uluk ita halo funu, antes ba funu ita barak ba hamulak tiha iha uma-lisan, husu matak-malirin para ita ba funu karik kilat musan labele kona ita. Biru mak vasina. Sientista sira deskobre ona entaun ita tenke aproveita oportunidade ida ne’e,”  Dr. Rui Araújo hato’o ba timoroan sira iha Reinu Unidu durante enkontru liuhusi ferramentu informátika Zoom ho tema Saida Mak Vasina? Saida Mak Vasina Kontra Covid-19? organizadu hosi komunidade timoroan, iha Peterborough, domingu liubá.

Médiku timoroan ne’e akresenta, primeiru vasina ne’ebé britániku sira dezenvolve ne’e uza teknolojia ne’ebé mak moderna liu ona, la’ós hanesan vasina uluk nian. Agora sira uza materiál jenétiku virus ne’e ninian mak dezenvolve vasina no bainhira materiál jenétika ne’e introdús ba ita-nia isin, ita-nia isin rasik mak prodús antibody atu nune’e ita-nia isin bele fasilmente kombate moras Covid-19 ne’e.

Virus ka bakteria hotu-hotu kuandu tama ita-nia isin, sira iha posibilidade atu halo mutasaun. Bainhira sira hetan rezisténsia husi ita-nia isin, virus sira ne’e mós buka dalan atu ultrapassa. Ne’e mak hodi mosu variante sira ne’e.

“Vasina ida agora ne’e importante tebes iha istória umanidade nian. Durante ne’e dezenvolvimentu vasina sira lori tinan barak atu hetan ninia sirkulasaun iha sosiedade nia laran mas ba kazu Covid-19 ne’e grasa husi teknolojia foun no peskiza sira ne’ebé sientista sira halo kle’ur ona no teknolojia ne’ebé uza ho materiál jenétika hatama fini mai ita-nia isin ne’e halo di’ak liután. Menus hosi tinan ida nia laran, sientista sira to’o ona iha faze atu implementa vasina”.

Nia hatutan, pontu ida tan importante atu akresenta mak molok to’o iha faze atu halo komersializasaun, liuhusi dalan oioin no ema millaun mak liu ona husi dalan ne’e. Sientista sira akompaña hotu faze por faze molok to’o autoridade ofisiál sira aprova duni katak vasina ne’e tenke uza.

“Tanba ne’e mak fila ba kestaun seguru ka efikasia hosi ponto de vista sientífika garantia duni i ida ne’e oportunidade di’ak ba ita hotu atu halo vasina hodi prevene moras ne’e. Maibé, medida preventiva individuál ne’e tenke kontinua nafatin” médiku timoroan ne’e fó hanoin.

Nune’e mós, Dra. Lídia Costa, médika timoroan ida ne’ebé oras ne’e serbisu iha Peterborough City Hospital rekoñese, vasina Covid-19 ne vasina ida foun. Sientista sira dehan ita tenke simu doses rua para bele fó ita protesaun másimu.  Maski ita simu ona vasina dose primeiru ita tenke halo tuir nafatin medida preventiva tanba virus ne’e ho variente virus foun ne’e sei la’o maka’as hela iha komunidade nia leet.

 Nia argumenta, tuir sientista sira, Vasina Pfizer ne’e proteje ita husi virus rua ne’e. Vasina AstraZeneca sientista sira dehan vasina ne’e fó protesaun 60-90%. Atu hetan 90% tenke simu doses ne’e dalarua mak hetan protesaun kumpleta (full protection). Maski ita simu ona vasina tenke kontinua halo tuir medida prevensaun sira ne’e hodi proteje ita-nia aan, família no komunidade.

 Razaun, tuir médika timoroan ne’e katak iha grupu vulnerável sira balun labele simu vasina ne’e ho razaun sira iha alerjia, moras kankru ka iha imunidade ne’ebé fraku tebes, ne’ebé sira labele simu vasina ne’e. Se ita iha família uma-laran mak ema ida tama kategoria ida ne’e, se ita sai ba li’ur halo kontaktu ho ema ne’ebé pozitivu no kuandu ita tama fali mai uma-laran, ita bele lori risku ba ita-nia família ne’e.

Pfizer só fó ba adultu ne’ebé tinan 16 ba leten. AstroZenica só ba tinan 18 ba leten. Ne’eduni, sira ne’ebé mak la simu vasina ne’e sira ne’e risku. Sientista sira dehan vasina ne la’ós proteje ita atu lahetan Covid-19 maibé atu proteje ita labele hetan komplikasaun hosi moras oioin purezemplu pulmaun no seluktan.

 “Tenke ba to’o komunidade para halo prevensaun másimu i se bele ba simu vasina ne’e. Sira ne’ebé simu ona vasina tenke fó testemuña katak vasina ne’e seguru. Tanba ita iha UK, ita iha privilejiu boot hodi simu vasina. Iha nasaun seluk inklui ita-nia rain Timor-Leste atu simu de’it vasina mós sei araska” nia fó mensajen.

“Autoridade UK la dehan se iha pozitivu Covid-19 bele ka labele simu vasina. Maibé, se ita sente unwell (isin-manas maka’as to 38*C) ne’e ita labele simu lai vasina. Bainhira ita rekupera ona mak foin bele simu vasina. Maibé, tuir ha’u hatene katak ema hotu-hotu tenke simu vasina,” médika timoroan ne’e salienta.

Iha parte seluk, sasin sira ne’ebé simu ona vasina Pfizer hateten katak laiha efeitu sekundáriu ne’ebé aat liu.

Sasin Domingos dehan: “Ha’u servisu ba Royal mail i loron-loron ami servisu kontaktu ho costumer (kliente) sira, entaun ami-nia kompañia haruka ami ba simu vasina Covid-19. Ha’u simu iha kuarta i to’o agora ha’u sei moris”.

Kronolojia, tuir nia katak primeru, médiku sira husu ita-nia istória moras nian, depois sira esplika no ikus sira haruka ita asina deklarasaun, ita aseita vasina Pfizer ka lae. “Ha’u aseita. Ida ne’e importante tebes ita fahe esperiénsia ba malu. Di’ak liu evita boatus, hakat ba oin ho pasu pozitivu i motiva ita-nia maluk sira atu iha korajen ba vasina hodi proteje ita husi moras komplikasaun oioin” nia enkoraja.

Sasin ida mós, Edmundo, haktuir: “Ha’u simu ona vasina iha semana kotuk. Nia gejala (sintoma) iha uitoan hanesan ho gejala vasina flu nian. Médiku sira dehan kedas se sente isin-manas karik hemu Paracetamol. Ha’u sente mal duni uitoan purezemplu sente isin baruk mas liu oras 1 ka 2 buat ne’e mós pasa. Agora ha’u hein hela atu ba simu vasina daruak”.

Sasin seluk, Rosalia Costa, Prezidente Komunidade Timor Oxford hakerek iha ninia kronolojia Facebook hafoin simu tiha vasina Pfizer Biontech nune’e: “Sente hanesan hetan previléjiu boot ida mai ha’u. Servisu foin mak loron 1 ho balun hanesan Senior Pharmacy Assistant iha Churchill Hospital. NHS convida atu simu Vaccine PFIZER BIONTECH. Ha’u-nia esperiénsia depois simu vasina. Ha’u seidauk hetan no sente reasaun aat ida. Injection/daun nia sona fatin mak moras uituan hanesan mós vasina sira seluk ita simu antes”.

Francisco husi TAIS-NI dehan: “Enkoraja ita-nia maluk sira atu simu vasina ne’e. Ita uza másimu teknolojia hodi ajuda sirkulasaun ba komunidade. Uza lian Tetun fahe informasaun ho Tetun tanba ne’e fasil i lais atu kompriende. Halo pre-recording vídeo para fahe informasaun kona-ba vasina katak vasina ne’e seguru i efikaz ba timoroan sira. Ita kontinua suport (apoia) ba timoroan sira. Maluk barak mak tama ospitál difisil atu esplika sira-nia moras ba médiku sira tanba sira iha difikuldade língua Inglés”.

Iha UK, timoroan barak ne’ebé serbisu iha liña frente ka frontline simu ona vasina.

Partisipa iha Zoom mak Dr. Rui Maria de Araújo, Dra. Lídia Costa, lider komunidade sira husi sidade Oxford, sidade Bridgwater, organizasaun TAIS-NORTH IRELAND, no timoroan sira seluk  ne’ebé hela iha London, Bristol no Peterborough.

Kontribuidór: Celso Oliveira

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here