Xefi Sentru Saúde Formoza I, Jaime dos Reis Belo. Imajen/Felicidade Ximenes.

DILI, 29 janeiru 2021 (TATOLI)—Sentru Saúde Formoza enfrenta difikuldade tanba laiha fatin atu pesoál saúde sira uza hodi hala’o serbisu ho di’ak, liuliu halo imunizasaun.

Xefi Sentru Saúde Formoza I, Jaime dos Reis Belo, hateten Coby house ka kontentór  ne’ebé durante ne’e uza hodi halo imunizasaun, oras ne’e kondisaun aat ona no difikulta tebes pesoál saúde sira iha tempu udan.

”Infraestutura grave, tanba pesoál saúde sira tuur iha liur mak fó tratamentu ba pasiente. Agora daudaun tempu udan, livru sira ne’ebé uza hodi hakerek naran ba imunizasaun ne’e bokon no dodok hotu,’’ Jaime dos Reis  Belo hateten ba jornalista Agência Tatoli  iha serbisu fatin, sesta (29/01).

Situasaun ne’e Jaime dos Reis Belo hato’o ona ba Serbisu Saúde Munisípiu Dili hodi relata ba nasionál, maibé seidauk rezolve.

Pesoál saúde sira ne’ebé serbisu iha Sentru Saúde Formoza I hamutuk na’in 90-resin kompostu hosi médiku, parteira, enfermeiru, tékniku aliadu sira, inklui funsionáriu administrasaun nian.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here