Sekretáriu Estadu Ambiente, Demétrio do Amaral de Carvalho no Prezidente empreza GAIA, Carbon Trading, Frank Joshua, asina akordu. Imajen/Mídia SEA

DILI, 29 janeiru 2021 (TATOLI)Sekretaria Estadu Ambiente (SEA) hamutuk ho empreza GAIA Carbon Trading husi Suisa, asina nota entedimentu atu empreza halo investimentu ba projetu komersializa karbonu no reflorestasaun ba ai-parapa.

Entendimentu ne’e asina husi Sekretáriu Estadu Ambiente, Demétrio do Amaral de Carvalho no Prezidente Empreza GAIA, Frank Joshua.

Sasin ba seremónia asina akordu ne’e mak Ministériu Justisa, Ministériu Obra Públika, no Ministériu Agrikultura no Peska.

“Ita asina nota entedimentu ho empreza GAIA atu dezenvolve projetu rua iha Timor-Leste hanesan investimentu komersializasaun karbonu, liuliu instalasaun fugaun enerjia efisiénsia ba uma-kain 200.000 no sei halo reabilitasaun no reflorestasaun ai-parapa ho posibilidade iha rai ektare 15.000,” Sekretáriu Estadu Demétrio do Amaral, informa sesta ne’e, hafoin asina akordu ne’e iha gabinete SEA, Bebora.

Governante ne’e dehan, kona-ba fugaun enerjia efisiénsia, sei husu kada uma-kain iha tinan-ida nia laran kuda ai-hun 12, nune’e iha tinan-ida bele kuda ona ai-hun milaun 1,4 no iha tinan 10 mai bele kuda millaun 14 husi intervensaun fugaun ne’ebé oferese ba uma-kain 200.000.

Iha tinan hirak liubá, iha plantasaun ai-parapa hamutuk ektare 14.000, maibé hetan degradasaun iha tempu naruk hahú husi segundo guerra mundial.

Tuir dadus atuál iha de’it ektare 1.000, tanba ne’e presiza investimentu tanba Orsamentu Jerál Estadu (OJE) kada tinan la to’o atu halo kobertura ba ai-parapa.

“Ita agradese tanba investimentu empreza ne’e bele ajuda mellora ita-nia ambiente,” nia tenik.

Projetu ne’e sei hahú hafoin estudu viabilidade no Governu mós sei halo akordu investimentu espesiál ho empreza.

Iha nota entedimentu ne’e atu loke prosesu ba faze estudu viabilidade no parte ida atu  investidor bele koñese entidade sira hotu iha Timor-Leste no liña ministeriál sira ne’ebé atu guia iha akordu investimentu, hafoin hahú instalasaun fugaun 200.000 ba uma-kain no reflorestasaun ba ai-parapa ektare 15.000.

Tuir Sekretáriu Estadu, kona-ba fundu, empreza mak sei aloka rasik hodi halo estudu viabilidade no kontrata konsultór sira atu halo estudu.

Iha biban hanesan, Prezidente empreza GAIA, Carbon Trading, Frank Joshua, kontenteno apresia ho akordu investimentu privadu  ne’e.

“Husi akordu ne’e, ha’u iha esperansa katak sei fó valór ba dezenvolvimentu iha Timor-Leste no ha’u hakarak investe duni atu ajuda salva ambiente iha Timor-Leste,” Frank Joshua promete.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here