Partidu Demokratiku. Imajen/Espesiál.

DILI, 29 janeiru 2021 (TATOLI)–Sekretáriu Jerál Partidu Demokrátiku (PD) António da Conceição hateten, PD sei iha kandidatu rasik hodi konkorre iha eleisaun prezidensiál 2022.

PD haree katak, problema ne’ebé nasaun hasoru ne’e só bele rezolve ho eleisaun. Kalohan dehan, eleisaun ne’ebé mak tenke ser halo mak ida presizidente repúblika nune’e rezolve problema sira ne’ebé iha.

Sekretáriu Jerál PD ne’e hateten, polítika atuál daudaun ne’e tenke solusiona liuhosi eleisaun.

“PD ninian hanoin katak iha tinan sira tuir mai, PD sei iha kandidatu, atu nafatin konkorre ba prezidente no ba Governu. La’os tanba PD haree katak ho kandidatu forte sira mak atu apoiu PD, maibé tanba iha PD mós forti ona. Entaun, PD hahú forte no sira hahú fraku ona. Ami sei iha kandidatu rasik,” Kalohan informa ba jornalista sira iha resintu Parlamentu Nasionál, sesta ne’e.

Xefe Bankada PD iha Parlamentu Nasionál ne’e akresenta, kandidatu ne’ebe sei mai ho vizaun hakarak atu kontribui ba rezolve problema impase polítiku iha rai-laran.

“Ha’u la afirma ha’u- nia-aan tanba ha’u uluk kandidatu tiha ona. Agora la presiza dehan ha’u presiza kandidatu aan, maibé ami iha tenke aposta ba perfil no aposta ba kapasidade atu lori nasaun ida-ne’e ho vizaun Estadu. Ami lakohi atu koloka vizaun partidu,” nia hateten.

Maske nune’e, Sekretáriu Jerál Partidu Demokrátiku ne’e hateten, seidauk iha konsensu atu propoin figura PD ida kompete iha eleisaun prezidensiál.

“Formalmente la ko’alia maibé informalmente ne’e hosi munisípiu to’o nasionál, soe ona hanoin ba malu atu tenke prepara kandidatu,” Kalohan informa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here