Ministru Petróleu no Minerál, Víctor da Conceição Soares. Imajen TATOLI/Egas Cristovão

DILI, 29 janeiru 2021 (TATOLI)-Ministériu Petróleu no Minerál (MPM) submete ona lista proposta nomeasaun membru Konsellu Administrativu (KA) husi parte Governu ba TL-Cement, ba konsellu Ministru (KM).

Proposta nomeasaun ne’e, MPM halo ho baze ba kompromisu Governu Timor-Leste hamutuk ho empreza TL-Cement atu kontinua projetu fábrika simentu iha munisípiu Baucau.

“Governu nia parte atu halo nomeasaun ba membru Konsellu Administrativu na’in-rua, ne’ebé proposta ne’e submete ona ba Konsellu Ministru, tuir planu kuarta oin mai atu halo aprovasaun,” Ministru Petróleu no Minerál, Víctor da Conceição Soares, informa hafoin hasoru malu ho Primeiru-Ministru (PM), Taur Matan Ruak, iha Pálasiu Governu, sesta ne’e.

Notísia relevante: Governu no TL-Cement hatudu kompromisu kontinua projetu simentu iha Baucau

Enkuantu, husi parte TL-Cement nomea na’in-ida atu membru KA bele avansa ba faze transformasaun husi Lda ba sosiedade anónima (S.A) atu hetan partisipasaun husi Governu-Timor Leste ho asaun 40%.

Governu kumpre ona ninia dever no obrigasun atu halo akordu no empreza mós kumpre hatama relátoriu utualizasaun orsamentu millaun $4,9 hodi halo atividade peskiza no estudu esplorasaun.

“Ita halo prosesu ne’e hotu atu avansa ba oin, liuliu lansamentu fatuk dahuluk, maibé ne’e seidauk deside kalendáriu tanba depende ba progresu sira ne’ebé la’o,” Ministru akresenta.

Antes ne’e, membru Governu relevante sira konvoka enkontru kortezia ho Prezidente TL-Cement, Jamees Rhee ho ninia ekipa, ne’ebé hatudu seriedade no kompromisu atu kontinua projetu ne’e.

Nune’e, Primeiru-Ministru kontinua fó konfiansa ba MPM atu akompaña progresu sira hodi bele realiza investimentu ne’e ho susesu.

Tuir planu, TL-Cement sei harii fábrika simentu besik zona luan nakonu ho ahu-ruin (kalkáriu) ho kualidade a’as iha rejiaun Baucau no sei halo produsaun ba simentu iha faze bázika hodi halo esportasaun no simentu ba abastesimentu konstrusaun sivíl iha Timor-Leste..

Iha proposta Orsamentu Jerál Estadu (OJE) 2019 propoin mós orsamentu millaun $50 hodi partisipasaun ba investimentu, ne’ebé Governu ninian asaun 40% hodi bele avansa prosesu ba oin no fó konfiasa ba investimentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here