Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 29 janeiru 2021 (TATOLI)-Ministru Petróleu no Minerál, Víctor da Conceição Soares, atualiza prosesu preparasaun empreza Timor-Resoruces halo perfurasaun mina-matan iha Kosta Súl ba Primeiru Ministru (PM), Taur Matan Ruak.

“Primeiru-Ministru bolu ha’u atualiza dezenvolvimentu setór petróleu no minerál nian, liuliu kona-ba preparasaun perfurasaun Timor Resoruces ba mina-matan lima iha Kosta Súl, iha área Suai no Same,” Ministru Víctor, hateten hafoin hasoru enkontru ho PM Taur, iha Pálasiu Governu, sesta ne’e.

Notísia relevante: Jullu 2021, Timor Resources fura mina-matan lima iha Kosta Súl

Tuir planu, iha jullu 2021, empreza australiana, Timor Resources hamutuk ho parseiru, Timór Gás no Petróleu, Empreza Públika (Timor GAP,E.P) sei halo perfurasaun mina-matan.

Daudaun halo hela instalasaun ba mákina perfurasaun sira no ekipa tékniku no jestór na’in-10 mai ona husi Indonézia iha dezembru 2020 no iha fulan ne’e balun mai tan, maibé sei iha kuaretena atu haree mákina perfurasaun ne’ebé besik tinan-ida ona iha Suai.

“Ha’u atualiza ba Xefe Governu katak trimeste daruak ne’e kompañia halo ona perfurasaun, tanba loloos halo ona perfurasaun iha trimestre dahuluk, maibé situasaun COVID-19 difikulta tékniku sira atu mai,” nia akresenta.

Iha enkontru ne’e, PM konfirma serteza hala’o atividade petrolífera ne’e tanba bainhira laiha serteza mak sei fó prejuizu.

Planu atuál sei haree ba perfurasaun tolu to’o lima iha bloku A no ida-idak husi perfurasaun ho klean to’o metru 2.000, ho ninia kalkulasaun kustu bele to’o milaun $35.

Bloku B haruka ona ba Timor GAP Onshore Block, ne’ebé hanesan subsidiáriu ida husi empreza públiku petrolíferu Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here