Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

DILI, 29 janeiru 2021 (TATOLI)–Membru Unidade Polísia Fronteira (UPF) salva membru Tentara Nasional Indonesia (TNI) na’in-13 ne’ebé mout ho ró Patrollamentu Speed Boat hosi tasi Indonézia tama ba tasi Oenupu, Bairru Kabulubu, Aldeia Citrana, Suku Beneufe, Sub-rejiaun Nítibe-RAEOA.

Membru TNI na’in-13 ne’e hala’o misaun iha área fronteira tasi Illa foho Sinai-Indonézia. Ró ne’ebé membru sira-ne’e uza mout iha 27 janeiru 2021, iha tuku 13:15 Otl.

“Mosu akontesimentu ita-nia kolega Tentara Nasional Indonesia na’in-13 sira ne’ebé servisu iha fronteira iha illa foho Sinai ho sira-nia ró Speed Boat atu mai sosa sasán iha Postu Administrativu Wepoli, Kupang, depois sira atu filafali bá foho Sinai laloran boot entaun tasi baku tiha sira-nia ró mout mai tiha iha ita-nia área Citrana,” Portavós PNTL, Superintendente Xefe, Arnaldo de Araújo ba jornalista iha edifísiu Kuartél Jerál PNTL, Dili, sesta ne’e.

“Ita-nia membru UPF Eskuadra Citrana mak salva sira hodi bá foti sira-nia identidade hodi kontatu ba Konsuladu Indonézia iha Oé-Cusse nune’e haruka sira fila ho kondisaun di’ak,” Arnaldo haktuir.

Tuir nia katak asaun salva ne’e nu’udar pasu importante no di’ak tebes hodi hametin liután unidade no kooperasaun servisu seguransa iha liña fronteira tasi no terrestre.

Kona-ba naran membru TNI na’in-13 inklui naran membru UPF sira ne’ebé halo asaun hodi salva membru TNI sira, parte Komandu PNTL labele fó-sai, tanba asuntu ne’e kabe ba servisu seguransa nian.

 Jornalista: Eugénio Pereia

Editór: Xisto Freitas

HAKEREK NO HATÁN

Please enter your comment!
Please enter your name here