Diretór Ezekutivu BNCTL, Brígido de Sousa. Imajen TATOLI/António Gonçalves

DILI, 29 janeiru 2021 (TATOLI)—Banku Nasionál Komérsiu Timor-Lesten (BNCTL, sigla portugés) apela ba kliente atu labele butuk hamutuk iha mákina Automated Teller Machine (ATM) ida bainhira halo levantamentu saldo, liuliu bainhira atu simu saláriu.

Tuir Diretór Ezekutivu BNCTL, Brígido de Sousa, mákina ATM iha territóriu tomak hamutuk 41 no iha dili 22.

“Ha’u bele dehan mákina BNCTL sufisiente atu atende kliente sira, maibé dala-barak kliente iha tendénsia ba forma iha ATM iha Obrigadu Barack, Caicoli, Timor-Plaza, Mandarin, sira la ba ATM iha Aeroportu, Maternidade Fatu-meta, maternidade iha Comoro, Tibar, no fatin seluk, hotu-hotu hakarak ba butuk hamutuk iha fatin ida, ha’u lahatene tanba saida? husu bainhira haree ATM ida nakonu bele ba fali fatin seluk,” Dirijente banku nasionál ne’e dehan ba Agência TATOLI hodi responde ba preokupasaun públiku nian, foin lalais ne’e, iha ninia knaar fatin, Caicoli.

Notísia relevante: Evita forma naruk, BNCTL promete atribui kartaun ATM ba idozu

Direjente ne’e rekoñese, konfuzaun liu iha fulan-dezembru, tanba saláriu husi funsionáriu públiku no setór privadu tama hamutuk de’it, inklui pagamentu ba désimu terseiru.

“La’ós atu defende-an, maibé ita-nia ábitu (toman) ida mak osan kuandu tama ona hakarak ba foti hotu kedas, maibé ATM ne’e funsiona oras 24, tanba ne’e bele hein oituan iha kalan maka ita la’o pasiar bele foti,” nia akresenta.

Diretór Ezekutivu ne’e dehan, bainhira iha transferénsia saldo ba konta kliente, BNCTL sempre aviza iha pájina ofisiál.

“Ha’u la’ós fó sala, loos duni ema hotu presiza osan, maibé se bele hein oituan, ou halo esforsu oituan, do que hein to’o minutu 30 hodi hein de’it, bele la’o bá fatin sira ne’ebé mamuk,” Brígido fó hanoin.

Antes ne’e, BNCTL divulga ona informasaun katak mákina ATM BNCTL rasik adere ona ba sistema P24, katak bainhira kliente ba ATM BNCTL maka ema forma barak, entaun ho kartaun P24 ne’e bele ba fali iha mákina ATM BNU no MANDIRI hodi foti osan, nune’e evita forma iha banku sukursál banku no ATM.

“Sukursal Dili no munisípiu hotu fahe hotu ona kartaun ATM P24, signifika katak ita iha opsaun ona hodi bele ba foti osan, bele halo transferénsia liuhosi mákina P24 banku seluk tanba kliente BNCTL mak barak liu. Ami atende kuaze 32.000 funsionáriu, ne’e foin funsionáriu de’it seidauk tan kliente seluk,” nia informa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here