Portavóz PNTL, Superintendente Xefe Arnaldo de Araújo. Imajen/dok.Tatoli

DILI, 29 janeiru 2021 (TATOLI)–Portavóz Komandu Jerál PNTL, Superintendente Xefe, Arnaldo de Araújo informa konfrontu grupu juventude ne’ebé akontese iha Aldeia Ailoro, Suku Faho-Ailiku, Postu Administrativu Hatuodo, Munisípiu Ainaro, kinta (28/01) kalan, rezulta joven ida sofre kanek todan.

Arnaldo dehan, bazeia ba rezultadu investigasaun iha terrenu nota katak suspeitu joven ida ho inisiál DDS mak organiza grupu balun halo asaltu ba vítima joven ho inisiál LZM, tanba problema privadu.

Iha akontesimentu ne’e, nia haktuir, PNTL Ainaro to’o kedas iha fatin hodi hakalma situasaun no detein suspeitu.

“Suspeitu oras ne’e daudaun detein ona iha sela Polísia Eskuadra Hatuodo,” Arnaldo ba jornalista iha edifísiu Kuartél Jerál PNTL, Caicoli, Dili, sesta ne’e.

Entretantu, vítima oras ne’e daudaun hala’o hela tratamentu saúde iha ospitál Ainaro tanba sofre kanek iha liman no ulun.

Parte PNTL Ainaro kontinua halo investigasaun ba suspeitu balun ne’ebé envolve iha akontesimentu.

Komandu PNTL Ainaro mós koloka ona membru iha fatin akontesimentu hodi evita akontese tan problema.

Jornalista: Eugénio Pereira  

Editór: Xisto Freitas

HAKEREK NO HATÁN

Please enter your comment!
Please enter your name here