Jogadór AD.SLB festeja sira-nia vitória iha kampu laran. Imajen/Mídia FFTL

DILI, 29 janeiru 2021 (TATOLI) – Sekretáriu Jerál AD SLB Laulara Domingos  Caero, hateten maski jogadór di’ak barak mak muda ona ba klube seluk maibé AD SLB sei la hakfodak tanba jogadór foun sei barak.

“Jogadór sira ne’ebé muda ne’e ba ami normal tanba iha mundu klube ida labele trava jogadór ida se nia kontratu hotu ona, nia hakarak muda ba klube seluk. Ami nian sira ne’ebé sai ona, ami sei la pániku no ami orgullu tanba sira bele lori esperiénsia hosi SLB ba klube seluk,” Domingos Caero hateten  ba Agência TATOLI iha edifisiu SLB Taibessi, sesta ne’e.

Notísia Relevante : Despede SLB, Mouzinho reforsa “Panteras Negras”

Nia dehan, ema hotu harii klube atu kompete buka kampiaun, maibé bazeia ba orientasaun prezidente klube Kay Rala Xanana Gusmão, atu organiza jogadór sira atu sai selesaun nasionál, nune’e bele reprezenta Estadu ida ne’e atu ba kompete iha rai-li’ur.

“Bainhira ami nia jogadór sira sai ba klube seluk la’ós tanba osan, maibé ba ezerse formasaun saida mak durante ne’e klube fó ba halo di’ak liután iha ne’ebá,” nia dehan.

Nia hatutan, agora daudaun  bola mania sira ko’alia barak kona-ba Mozinho de Lima, João Pedro no Jhon Frith, sai ona hosi SLB sei monu maibé ba sira sei la hakfodak.

“Uluk bainhira Agali, Aguma, Ongou sira sai ema dehan SLB sei tun ona ba segunda divizaun, maibé realidade laiha, SLB foin lalais tama final dala hira ho Lalenok,” nia hateten.

Iha fevreiru, tinan ne’e, SLB sei bolu jogadór sira hodi fó kontratu, maibé iha kontratu mós iha konkordánsia katak bainhira joga mak foin bele simu osan no jogu laiha sei la simu osan.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here