GP (General practitioner). Ilustrasaun

INGLATERA, 29 janeiru 2020 (TATOLI)-Timoroan sira ne’ebé rezide iha Reinu Unidu ka UK (United Kindom) tenke rejista iha GP (General practitioner) atu nune’e karik bainhira moras bele halo tratamentu di’ak iha sentru saúde no ospitál sira.

Dra. Lídia Costa, médika timoroan ida servisu iha Peterborough City Hospital prontu atu fó asisténsia hodi fahe nafatin informasaun ba timoroan sira bainhira sira iha difikuldade kona-ba linguajen medisina ka moras nian.

“Ha’u mós hakarak fó hanoin ba maluk timoroan sira iha UK atu rejistu imi-nia aan iha GP. Rejistu iha GP ne’e importante tebes atu nune’e, bainhira imi moras karik bele hetan tulun lalais no di’ak husi médiku sira,” Dra. Lídia Costa sujere ba timoroan sira iha UK, iha ámbitu Zoom Meeting ho tema Saida Mak Vasina? Saida Mak Vasina Kontra Covid-19? organizadu hosi komunidade timoroan, iha Peterborough, domingu liubá.

Pesoál saúde timoroan ne’ebé atualmente rezide iha UK ne’e hatutan: “Fó sujestaun ruma kona-ba kursu inglés tanba timoroan barak mak iha difikuldade ho língua atu ba konsulta, trata dokumentu, etc atu nune’e bele hetan asisténsia médiku ne’ebé di’ak. Ha’u ko’alia nune’e tanba ha’u iha esperiénsia tulun timoroan balun ne’ebé loloos ne’e sira-nia kazu simples hela maibé tanba Inglés entaun sira komplika prosesu ne’e sai difisil liután”.

Nia mós husu ba komunidade atu kuidadu aan, labele halibur-malu, labele kaer liman no seluktan tanba ema barak liu ona mak mate iha sentru ospitalár sira. Kazu Covid-19 sa’e maka’as to’o ospitál nakonu.

“Virus Covid-19 ne’e la’ós bosok. Ne’e virus ida ne’ebé hada’et lalais i oho ema barak ona. Ne’eduni, kuidadu aan i se iha ona vasina tenke tuir.  Tuir estudu sientista ne’ebé foin sai dehan Pfizer ho AstroZenica bele fó protesaun ba ita-nia isin husi Covid-19 no mós variante foun. Ha’u prontu kontinua apoiu komunidade. Husu ba responsável sira partilla nafatin informasaun ba komunidade,” Dra. Lídia Costa husu.

Atividade enkontru virtuál ho ferramente informátika Zoom ne’e envolve médiku timoroan sira hanesan Dr. Rui Maria de Araújo, Dra. Lídia Costa inklui lider komunidade sira husi sidade Oxford, sidade Bridgwater, organizasaun TAIS-NORTH IRELAND, no timoroan sira seluk  ne’ebé hela iha London, Bristol no Peterborough.

Kontribuidór: Celso Oliveira

Editór: Rafy Belo

HAKEREK NO HATÁN

Please enter your comment!
Please enter your name here