Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (29/01), Imajen TATOLI/Egas Cristovão

DILI, 29 janeiru 2021 (TATOLI)Iha implementasaun Estadu Emerjénsia (EE) da-sanulu, Governu deside bainhira iha sidadaun tama ilegál husi fronteira terrestre mai territóriu nasionál, kumpre kuarentena obrigatóriu durante loron-14 no tenke selu rasik fatin kuarentena inklui hahán.

“Medida ba hirak ne’ebé tama mai territóriu nasionál iha opsaun rua, kuandu tama mai ekipa saúde lori ba tau iha kuarentena ne’ebé prepara husi Governu iha Tasi-tolu ne’e sei hela gratuita, maibé kontráriu ho sira tama ilegál, tenke kumpre kuarentena ne’ebé prepara husi Governu no tenke selu rasik,” Ministru Prezidénsia Konsellu Ministru, Fidelis Manuel Leite Magalhães, informa hafoin reuniaun ezekutivu, iha Palásiu Governu, sesta ne’e.

Notísia relevante: EE da-sanulu: Governu deside halakon auto-kuarentena, exeptu diplomata

Ho nune’e, Portavós Governu ne’e apela ba sidadaun hotu atu labele koko pasajen ilegál husi fronteira terrestre sira tanba ne’e konsidera aktu kriminál.

“Governu dehan sidadaun hotu atu fila ba ninia rain, maibé tuir dalan legál nune’e bele hela iha kuarentena no pesoál saúde bele kontrola no halo teste,” nia fó hanoin.

Governante ne’e konsidera, pasajen ilegál lori risku boot ba komunidade, família no nasaun tomak, tanba ne’e tenke aplika medida duru.

“Se tama ilegál bele akuza no tenke selu rasik ninia kuarentena no sei aplika tan koima. Ha’u hanoin aplika selu rasik kuarentena ne’e la kontribui redús númeru tama ilegál,” Portavós Governu fó hanoin.

Aleinde ne’e, iha EE da-sanulu, individuu hotu ne’ebé hakarak tama no sai husi territóriu nasionál sei kontinua obrigatóriu sujeita ba kontrolu sanitáriu.

“Sei kontinua mós obrigatóriu ba izolamentu profilátiku (kuarentena) ho durasaun mínima loron-14 no halo teste ba COVID-19 no ba sidadaun ne’ebé tama iha territóriu nasionál hatudu sintoma COVID-19,” ka ema sira iha ona kontaktu ho individuu sira ne’ebé infetadu,” Ministru hatutan.

Despeza relasiona ho izolamentu profilátiku responsabiliza husi individuu ida-idak bainhira kumpre iha estabelesimentu saúde ka iha sentru izolamentu privadu ne’ebé estabelese husi Governu.

Antes ne’e, hahú EE daneen, ba individuu ne’ebé tama territóriu nasionál liu dalan ilegál, Governu aplika multa $30 to’o $250 no osan sira ne’e sei suporta ba despeza iha fatin kuarentena.

Koima ne’e aplika ba timor-oan no sidadaun estranjeiru ne’ebé tama mai teritóriu Timór ho dalan ilegál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here