Prezidente CNE, Alcino de Araújo Barris . Imajen TATOLI/Egas Cristovão.

DILI, 29 janeiru 2021 (TATOLI)—Prezidente Komisaun Nasionál Eleisaun (CNC-sigla portugés), Alcino de Araújo Barris, ohin, informa atividade CNE ne’ebé mak durante ne’e realiza ona ba Prezidente Repúblika Francisco Guterres “Lú Olo” iha Palásiu Prezidénsiál Nicolau Lobato, Bairru-Píte, Dili.

“Ohin, CNE kompostu hosi komisáriu na’in-lima (5) inklui ho apoiu tékniku mai halo audiénsia ho Prezidente Repúblika Francisco Guterres “Lú Olo” hodi informa atividade ne’ebé realiza tiha ona,” Prezidente CNE, Alcino de Araújo Barris, hateten ba jornalista halo audiénsia ho PR Lú Olo, sesta ne’e.

Nia haktuir, iha biban ne’e CNE mós informa ba Prezidente Repúblika liuliu kona-ba eleisaun antesipa ne’ebé foin hotu liubá no CNE halo kedas revizaun aktu eleitorál. CNE fó pareser ba Governu hosi Ministériu Administrasaun Estatál (MAE) kona-ba lei balun ne’ebé presiza revee.

Nia dehan, iha artigu balun la pertenente no tenke aumenta sentru tanba eleitór sira mós propoin númeru ne’ebé lei dehan ne’e tenke altera maibé revizaun ne’e CNE entrega pokote tomak ba Ministériu Adminstrasaun Estatál (MAE).

Nia hateten, ida-ne’e fasilmente MAE bele ajuda tanba MAE nia kompeténsia mak halo revizaun no CNE pratikamente hatene, nune’e tenke prevee ona.

Aleinde ida ne’e, CNE mós prepara pareser ida hanesan esbosu kompletu ne’ebé regulariza kedas kódigu eleitorál no CNE haruka ona ba MAE, maibé sei tarde apresia ne’ebé bele asegura ona no depois lori ba Konsellu Ministru.

“Bainhira aprova ona sei haruka tutan ba Parlamentu Nasionál (PN), karik bele apresia no aprova,” nia dehan.

Nia hateten, CNE mós informa kona-ba peskiza ida para haree lalaok ne’ebé mak durante ne’e CNE hamutuk ho Sekretáriu Tékniku Administrasaun Eleitorál (STAE) haree nia vantajen no desvantajen ruma, ba oin bele mellora liután servisu.

Aleinde ida ne’e, CNE mós propoin atu estabelese sentru formasaun dezenvolvimentu demokrátiku no se ideia ida-ne’e mak parte hotu-hotu apoiu mak futuru Timor sei hetan evolusaun ba demokrásia ida-ne’ebé di’ak, tanba atu garante sentru formasaun dezenvolvimentu demokratizasaun iha nasaun ne’e nian.

Tuir nia, Prezidente Repúblika Francisco Guterres Lú Olo sente ideia ne’e pertinente tebes maibé tenke servisu makaas atu oinsá bele influénsia hodi harii sentru refere.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here