Seremónia fúnebre Sauzodu Sabino Soares ‘Guntur’ iha Jardim dos Herois, Metinaro, kinta (28/01). Imajen TATOLI/Antónia Gusmão

DILI, 28 janeiru 2021 (TATOLI)Estadu deside haloot Sauzodu Sabino Soares ‘Guntur’ iha toba fatin ikus Jardim dos Herois, Metinaro, Dili, bazeia ba dekretu Prezidente Repúblika númeru 5/2021, loron 27 janeiru, tuir Konstituisaun artigu 11 ne’ebé fó rekoñesimentu ho valorizasaun ba rezisténsia sira.

Iha seremónia fúnebre, reprezentante família, Hernani Soares, sente triste tanba lakon ona saudozu.

“Família lakon tan ema ida ne’ebé sai hanesan patrimóniu ba família. Ami sente triste tebes no difísil atu simu realidade ida-ne’e. Durante okupasaun Indonézia iha Timor-Leste, inimigu sira kaer no halo torturasaun maibé nia (Guntur) la mate,” Hernani Soares hateten iha ámbitu seremónia fúnebre, iha Metinaro, kinta ne’e.

Notísia relevante: Deputadu ‘Guntur’ hakotu iis tanba diabetes

Nia haktuir, iha tempu okupasaun Indonézia, Guntur ema ida ne’ebé terus momentu ne’ebá ho idade sei kiik, labele asesu edukasaun hanesan ho nia maluk sira seluk tanba hakarak dedika-an ba ukun rasik-an.

“Iha tempu independénsia, Guntur ho nia maun-alin sira kontinua moris iha estrada ninin tanba sira laiha koñesementu, maibé ho kapasidade ne’ebé iha, kontinua halo advokasia liuhosi organizasaun CPD-RDTL,” tenik reprezentante família.

Bainhira harii Partidu Libertasaun Populár (PLP), saudozu asume kargu estratéjiku iha estrutura, no husi partidu ida-ne’e maka nia hetan oporturnidade hodi dezenvolve no kapasita-an, aprende polítika reál kompara ho vida ativista.

“Bainhira saudozu envolve-an iha vida polítika, ami família sente kontente no orgullu tanba nia bele aprende buat barak husi polítika iha Parlamentu Nasionál no partidu ne’ebé nia haknaar ba,” Hernani Soares hatutan.

Nune’e, família la espera ninia karreira polítika bele termina no sente todan simu realidade.

“Família hanoin katak Saudozu Guntur iha ona kareirra polítika iha futuru, maibé ami-nia mehi to’o de’it iha ami-nia kakutak no labele realiza, saida mak ami hasoru mak kaixaun no Guntur nia karreira naben hanesan jelu fatuk ida ne’ebé ami soe iha loro-matan naben tiha ona,” nia triste.

Bainhira rona saudozu moras, família halo esforsu oinoin liuhosi lisan kulturál, espirituál, no médiku sira, maibé esforsu hirak ne’e laiha kbiit atu manan.

“Maromak ne’ebé kria iha planu ona hodi hakotu nia peregrinasaun iha mundu,” nia subliña.

Iha fatin hanesan, Espoza saudozu Guntur, Elizita Fátima de Jesus, husu Governu atu tau-matan ba nia ho ninia oan sira.

“Ha’u hakarak de’it Governu tau-matan netik ba ha’u-nia oan sira, atu nune’e sira bele atinje sira-nia eskola to’o ramata, tau-matan mós ba ha’u feto faluk. Ha’u ho ha’u-nia oan sira uma laiha, ami hela de’it ho ha’u-nia inan aman sira, ne’ebé ha’u husu Governu harii hela uma ida ba ami,” dehan Elizita Fátima.

Bainhira atu haloot saudozu, Veteranu Costodio Belo “Alin Laek”, lee dekretu Prezidente Repúblika.

Iha ámbitu ne’e, Estadu liuhosi Prezidente Parlamentu Nasionál, Deputadu Aniceto Guterres entrega bandeira RDTL ba oan mane saudozu, Salaguero Guntur, nu’udar rekoñesementu Estadu ba saudozu nia kontribuisaun iha luta libertasaun nasionál.

Seremónia fúnebre ne’e partisipa husi Primeiru-Ministru, Taur Matan Ruak, Prezidente Tribunál Rekursu, Deolindo dos Santos, Prezidente Parlamentu Nasionál, Aniceto Longuinhos Guterres, membru Parlamentu, membru Governu, membru partidu polítiku sira, inklui família saudozu.

Sabino Soares ‘Guntur’ moris iha 08 jullu 1975 iha Lelalai, postu administrativu Quelicai, munisípiu Baucau.

Guntur hanesan deputadu ativu iha V Lejizlatura husi Bankada PLP.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here