Komandante Jerál PNTL,, Komísariu Faustino da Costa. Imajen TATOLI/Egas Cristovão

DILI, 28 janeiru 2021 (TATOLI)–Komandu Polísia Munisípiu Dili kontinua koopera ho Ekipa Jestaun Merkadu Munisípiu Dili halo operasaun muda sai negosiante ambulante sira ne’ebé kontinua fa’an sasán báziku okupa espasu públiku.

Iha área Kampung Baru, Rotunda Nicolau Lobato Comoro, Ponte Becora, Delta Elemloi nian kuaze lorokraik negosiante okupa estrada hodi hamosu engarrafamentu.

“Ekipa Komandu Munisípiu Dili no Ekipa Jestaun Merkadu Dili kontinua halo operasaun hodi sobu negosiante ambulante sira-ne’e, no ita mós husu konxiénsia negosiante sira, tanba labele obriga beibeik ho lei. Loos ita hakarak buka moris, maibé tenke kumpre regra,” Komandante Jerál Polísia Nasionál Timor-Leste (PNTL), Komisáriu Polísia, Faustino da Costa ba jornalista iha Palásiu Prezidente Nicolau Lobato, Bairru Pité, Dili, kinta ne’e.

Komandu PNTL husu negosiante sira kolabora ho polísia bainhira husu muda atu evita membru sira uza forsa hadau sasán no apreensaun ba karrosa.

Nia haktuir, dalabarak negosiante sira fa’an sasán soe fo’er arbiru iha estrada públiku ne’ebé implika ba imajen sidade Dili.

Antes ne’e, Segundu Komandante PNTL Munisípiu Dili, Superintendente Euclides Belo informa PNTL mós sei halo operasaun muda sai komunidade nia karreta aat ne’ebé para okupa espasu públiku.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here