Imajen/Espesiál.

DILI, 28 janeiru 2021 (TATOLI)–Vise-Xefe Bankada Partidu Libertasaun Popular (PLP), Deputadu Francisco de Vasconcelos informa,  ohin, família no Estadu haloot saudozu Sabino Soares “Guntur” iha Jardim dos Herois Metinaro, Dili.

Notísia Relevante: PN aprova votu pezár ba Deputadu Guntur

“Agora mate isin iha ona Baucau no orsida tuku 16.00 ita hotu sei ba haloot saudozu Sabino Soares ‘Guntur’ iha Jardim dos Herois Metinaro,” Vise-Xefe Bankada Partidu Libertasaun Popular (PLP), Deputadu Francisco de Vasconcelos informa ba jornalista sira iha resintu Parlamentu Nasionál, kinta ne’e.

Vise-Xefe Bankada PLP sente triste ho Deputadu Sabino Soares “Guntur” nia mate maibé ida-ne’e Maromak nia planu hotu.

Nia haktuir, saudozu “Guntur” mós hola parte ba prosesu luta ba libertasaun nasionál tanba ne’e merese haloot iha Jardim dos Herois.

Prezidente Parlamentu Nasionál, Deputadu Aniceto Longuinhos Guterres mós sei partisipa serimónia funebre refere.

Iha loron 25 janeiru 2021 liubá, Parlamentu Nasionál (PN), aprova votu pezár hodi presta última omenajen ba Deputadu Sabino Soares ‘Guntur’.

Parlamentu Nasionál aprova votu pezár ho rezultadu votasaun a-favór 60.

Sabino Soares ‘Guntur’ moris iha 08 fulan-jullu 1975 iha Lelalai, Postu Administrativu Quelicai, Munisípiu Baucau. Saudozu nu’udar oan mane dahaat hosi inan-aman Luis Soares no Celestina Boavida Freitas.

Saudozu Sabino Soares “Guntur” kaben ho Elizita Fátima de Jesus hosi suku Lauhata, Postu Administrativu Bazartete, Munisípiu Liquiçá.

Saudozu Guntur kaben ho Elizita Fátima de Jesus, husik hela oan na’in-lima (5) kompostu hosi mane na’in haat (4) no feto na’in-ida (1).

Oan na’in-lima ne’e mak hanesan Selly Romance Guntur Soares, Salagueru Guntur Soares, Salaria Guntur Soares, Jemmore Ellymor Guntur Soares no Jé Guntur Kay Rala Ell Fátima Soares.

Notísia Relevante: Saudozu “Guntur” nia lian hanesan “Guntur” manan ukun rasik aan

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here