Estudante Eskola Sentru Aprendizajen Informasaun Eskolár (CAFE-sigla portugés) Maliana, Munisípiu Bobonaro. Imajen/Agapito dos Santos

DILI,28 janeiru 2021 (TATOLI)—Ministériu Obra Públika (MOP), halo ona verifikasaun ba dokumentu reabilitasaun no konstrusaun edifísiu eskola CAFÉ lima iha munisípiu lima, ne’ebé submete hosi Diresaun Nasionál Infraestrutura Edukativa (DNIE), Ministériu Edukasaun Juventude no Desportu (MEJD).

Diretór nasionál DNIE, Hélio Lopez fó sai novidade ne’e tanba nia parte akompaña direta ekipa verifikadór sira hosi MOP durante prosesu tomak.

Notísia Relevante:MEJD sei konstrui edifísiu eskola CAFE haat ho millaun $4

“MOP termina ona verifikasaun ba dokumentu projetu eskola CAFE lima,” Hélio Lopez, ba jornalista Agência Tatoli iha serbisu fatin Balide, kinta (28/01).

Diretór ne’e hateten, maski MOP mak halo verifikasaun ba dokumentu no terrenu, maibé DNIE nu’udár na’in ba projetu kontinua halo akompañamentu ba prosesu ne’e.

“Dokumentu ne’ebé ami submete ba MOP konsidera tuir nafatin ninia prosedimentu legál sira. Tanba ne’e mak iha ona verifikasaun no prosesu ne’e la’o, espera katak marsu bele hahú ona konstrusaun,” nia subliña.

Nia mós seidauk simu rezultadu verifikasaun hosi MOP kona-bá konstrusaun iha munisípiu ne’ebé mak sei hetan aprovasaun no ida ne’ebé mak sei la hetan aprovasaun.

Planu reabilitasaun ba eskola CAFE ida iha munisípiu Baucau no konstrusaun ba edifísiu foun haat iha munisípiu Lautém, Covalima, Ainaro, no Liquiçá ninia orsamentu mai hosi fundu infraestrutura ho montante millaun $4-resin.

Entretantu, dokumentu ne’ebé antes ne’e DNIE submete ba MOP mak hanesan Bill Of Quantity (BOQ), dezeña konstrusaun no seluk tan.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here