Komandante Jerál PNTL, Komísariu Faustino da Costa ho Segundu Komandante Komísariu Mateus Fernandes. Imajen Tatoli/Egas Cristovão

DILI, 28 janeiru 2021 (TATOLI)–Komandu Jerál Polísia Nasionál Timor-Leste (PNTL) kompromete asegura metin implementasaun Estadu Emerjénsia (EE) ba da-sanulu.

Kompromisu ida-ne’e fó-sai hosi Komandante Jerál Polísia Nasionál Timor-Leste (PNTL), Komisáriu Polísia, Faustino da Costa no Segundu Komandante, Komisáriu Polísia, Mateus de Jesus, bainhira hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, kinta ne’e.

Prezidente Repúblika, Francisco Guterres Lú Olo, iha 27 janeiru 2021, dekreta EE da-sanulu ba loron loron tolu-nulu (30), hahú husi tuku 00.00 iha 02 fevereiru 2021 no termina iha tuku 23.59 iha 03 marsu 2021.

Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.

“Ami diskute liu mak situasaun iha fronteira, oinsá mak ami asegura fronteira ne’e para labele iha buat ida atividade ema tama ilegál,” Faustino ba jornalista sira.

Komisáriu Faustino ho PR Lú Olo aprezenta mós kondisaun servisu membru Unidade Patrollamentu Fronteira hetan apoiu hosi Unidade Espesiál Polísia (UEP), Unidade Polísia Marítima (UPM) no hetan apoiu hosi Komandu F-FDTL.

Kona-ba apoiu lojístika no ekipamentu seluk hanesan rádiu komunikasaun, farda, botas, kapa udan nian rasik hetan apoiu hosi Governu Xina no Komandu PNTL hahú halo ona distribuisaun.

Komandu PNTL mós kontinua halo koordenasaun ho autoridade inklui komunidade hodi aperta metin seguransa iha liña fronteira hodi evita povu nasaun viziñu tama.

Nia hatutan, Komandu PNTL kontinua ezekuta prosesu fó sansaun ba kualkér sidadaun, katak bainhira tama ilegál sei selu multa ba Estadu no PNTL sei prosesa sira tuir lei.

Komisáriu Faustino rekoñese ema kontinua tama ilegál, tanba postu fronteira dook malu ho distánsia kilómetru 29, maibé membru sira halo nafatin patrollamentu detein sidadaun sira ne’ebé tama ilegál.

Komandu PNTL no F-FDTL rasik mós kontinua halo koordenasaun metin hodi asegura seguransa iha fronteira terrestre no tasi nian.

Kona-ba deklarasaun polítika Deputada Bankada Partidu KHUNTU, Olinda Guterres, ne’ebé husu UPF atu “tiru tohar” ema ne’ebé hakat tama ilegál, Komisáriu Faustino hatán PNTL nia lei la fó autorizasaun ba kualkér membru atu tiru kualkér sidadaun sira.

“Ami iha regra servisu, la’ós arbiru,” Komandante Faustino realsa.

Komandu PNTL komesa harii ona sira-nia postu vizilánsia iha liña fronteira no aumenta mós membru hodi asegura metin liña fronteira sira.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here