Komandante Jerál PNTL, Komísariu Faustino da Costa.Imajen/Antonio Goncalves

DILI, 28 janeiru 2021 (TATOLI)–Prosesu ezame balístiku ba embolku ne’ebé autór deskoñesidu uza hodi tiru-mate komunidade nia karau ne’e sei hein rezultadu investigasaun hosi ekipa konjunta komandu PNTL no F-FDTL.

Komandante Jerál Polísia Nasionál Timor-Leste (PNTL), Komisáriu Polísia, Faustino da Costa rekoñese nia rasik simu ona keixa hosi Administradór Munisípiu Manufahi kona-ba kronolojia kazu tiru-mate komunidade nia karau tolu iha área Weto, Suku Dotik, Postu Administrativu Alas, Munisípiu Manufahi.

Notísia relevante: Lere orienta Departamentu Justisa F-FDTL investiga kazu tiru karau

Antes ne’e, Komandu PNTL Manufahi rasik harii ona ekipa hodi halo investigasaun konjunta ho ekipa Departamentu Justisa F-FDTL ba asaun refere.

“Ita hein hela investigasaun konjunta ne’e. Ita hein ekipa konjunta para labele haree hosi parte ida mesak, depois mak ita identifika loloos hodi haree sira-nia rekomendasaun oinsá,” Komisáriu Faustino dehan iha Palásiu Prezidente Nicolau Lobato, Bairru Pité, Dili, kuarta ne’e.

Antes ne’e, iha tersa (26/01), Komandu F-FDTL rasik haruka ona ekipa Departamentu Justisa F-FDTL hodi loke prosesu investigasaun ba kazu tiru komunidade nia karau ne’ebé akontese iha 14 janeiru 2021, purvolta tuku 21:20 Otl.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here