Traballadór sira hatun foos iha Portu Dili. Imajen TATOLI/António Gonçalves

DILI, 28 janeiru 2021 (TATOLI)–Folin foos iha loja no supermerkadu sira iha Dili la ezajeradu ka la sa’e maka’as hanesan ema espékula.

Tuir jerente loja Kretif Furak Bidau, Anton Hendrick hateten loja Kreatif Furak daudaun sei fa’an foos ho presu ne’ebé normál.

“Ami la hasa’e folin foos. Ami fa’an tuir presu ne’ebé mak iha, maski iha mundu agora daudaun ne’e foos folin sa’e maka’as. Ami tenke adota tuir situasaun ne’ebé mak Timor-Leste iha,” Anton dehan ba Agência Tatoli iha Bidau, Dili, kinta ne’e, relasiona ho impaktu Pandemia Covid-19 ne’ebé implika ba kustu sasán nesesidade bázika.

Nia hateten, foos ne’ebé sira fa’an iha sira-nia supermerkadu ne’e, kilógrama 25 ho folin kontinua ho $12  no kilógrama 20 ho folin $10.50.

Anton hatutan, foos ne’ebé sira fa’an ne’e ho marka Tali Merah importadu hosi Índia.

Entretantu, Diretór Operasaun Autoridade Inspesaun Fiskalizasaun Atividade Ekonómika no Sanitária (AIFAESA), Gabriel da Costa  hateten presu foos iha Dili daudaun normál no iha presu balun sa’e maibé la sa’e liu.

“Iha kapitál Dili to’o agora seidauk iha informasaun ka keixa kona-ba reklamasaun ruma hosi komunidade mai iha AIFAESA. Presu iha Dili to’o agora ami-nia observasaun buat hotu-hotu la’o normál. Karik hasa’e mak hosi $0,50 to’o $1 tanba relasiona ho taxa. La liu ida-ne’e,” nia tenik.

“Foin daudaun distributór sira mai fó hatene AIFAESA katak sira hasa’e folin hosi $0.50 ba $1 no  balun hasa’e ba $0.25 tanba taxa importasaun foos ho folin aas uitoan. Tanba  ne’e, foos kilógrama 25 ne’e normalmente ho folin $9.50 maibé agora sa’e uitoan ba $10.50 to’o $11.50,” nia akresenta.

Nia dehan, kuandu empreza hasa’e folin foos ho demaziadu, AIFAESA sei tún halo apreensaun no multa tanba dekretu Governu hateten klaru katak empreza sira labele fa’an sasán ho presu liu pursentu 10.

Tuir observasaun jornalista TATOLI iha terrenu, presu foos iha loja W Ford Audian ho marka Beruan kilógrama 25 ho presu $13, foos ho marka Folsom kilógrama 15 ho presu $12.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here