Diretora Serbisu Saúde Munisípiu Dili, Agostinha Segurado. Imajen/Felicidade Ximenes.

DILI,28 janeiru 2021 (TATOLI)—Ministériu Saúde (MS), hahú hala’o sensibilizasaun ba profisionál saúde iha munisípiu Dili, oinsá halo atendimentu hanesan ba ema hotu, liuliu fó atendimentu dignu ba ema ho defisiénsia.

Sensibilizasaun ne’e hala’o liuhosi semináriu loron rua, hahú hosi 28 to’o 29 janeiru ne’ebé hala’o iha otél Luz Clarita, Dili.

Orientasaun ne’e kona-bá violénsia bazeia ba jéneru, ema ho defisiénsia no direitu umanu,” Diretora Serbisu Saúde Munisípiu Dili, Agostinha Segurado, ba jornalista sira, kinta (28/01).

Nia esplika, durante semináriu ne’e, Ministériu Saúde fó orientasaun ba profisionál saúde atu fó atendimentu dignu ba vítima kualkér violénsia, liuliu violénsia doméstika no ba maluk defisiénsia atu labele iha diskriminasaun.

“Labele iha diskriminasaun ba ema ho defisiénsia tanba sira iha direitu atu hetan asisténsia no atu bele mai iha fasilidade saúde. Ema ho defisiénsia isin rua, dalaruma mai ita hakfodak. Ida ne’e labele akontese,” nia alerta.

Tanba ne’e, Agostinha Segurado apela ba profisionál saúde sira, bainhira hala’o tratamentu labele husik ema ida iha kotuk.

Nia mós husu ba ema hotu atu informa ba parte kompetente, bainhira iha pesoál saúde ruma halo diskriminasaun iha atendimentu sira.

“Karik pesoál saúde sira trata la ho dignu, halo nota no informa, tanba ita garante profisionál saúde sira iha juramentu katak, labele halo diskriminasaun ba ema,” nia subliña.

Agostinha Segurado rekoñese katak, durante ne’e mosu duni diskriminasaun iha tratamentu sira, balun komunikasaun ladún di’ak, no la hatene rai segredu hodi kumpre juramentu ne’ebé sira halo atu tau aas ema nia dignidade, liuliu fó asisténsia ne’ebé seguru.

Iha fatin hanesan, reprezentante Organizasaun Mundiál Saúde (OMS) Arvind Mathur hateten, Orientasaun atendimentu no kuidadu saúde ba ema ho defisiénsia iha Dili importante, tanba labarik feto no feto ho defisiénsia ne’ebé hetan diskriminasaun konsidera nu’udár  dupla diskriminasaun.

Nia fó hanoin katak, peskiza hosi Programa Saúde Nabilan no Estudu ba Esperiénsia Moris (2015) iha Timor-Leste hatudu katak, esperiénsia fíziku ka violénsia abuzu seksuál no abuzu emosaun ba feto ho idade 15 to’o 49, konsidera hamonu dignidade feto kuaze 59% no 55%.

Hanesan mós Demographic and Health Surveys (DHS) iha tinan 2106 hatudu prevalénsia aas hosi intimidasaun no violénsia iha Rejiaun Administrativa Espesiál Oe-cusse Ambeno (RAEOA) 65%, no munisípiu Baucau 25%.

Tanba ne’e, OMS ondradu tebes ba oportunidade ida ne’e, atu kolabora ho Ministériu Saúde liuliu fó orientasaun ba profisionál saúde sira no espera katak, sei bele hasa’e abilidade iha atendimentu saúde.

OMS iha nafatin responsabilidade atu kontinua suporta hodi promove kapasidade profisionál saúde no promove direitu ema ho defisiénsia.

Semináriu ne’e rasik realiza tanba Ministériu Saúde serbisu hamutuk ho OMS, ne’ebé hanesan inísisiu treinamentu atu kapasita profisionál saúde sira.

Tuir planu, sei iha treinamentu espesífiku ba profisionál saúde sira, oinsá atende ema ho defisiénsia ne’ebé hetan moras ruma presiza trata ho dignu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here