Komandante PNTL Munisípiu Dili, Superintendente Xefe Henrique da Costa, Imajen/Tatoli.

DILI, 27 janeiru 2021 (TATOLI)–Komandante Polísia Munisípiu Dili, Superintendente Xefe, Henrique da Costa apela ba membru Konsellu Polísiamentu Komunitáriu (KPK) atu kontinua servisu hamutuk ho Ofisiál Polísia Suku (OPS) hodi ajuda rezolve problema sira iha bairru sira iha Dili.

Henrique dehan, papél membru KPK importante hodi koordena ho autoridade suku no ajuda polísia asegura estabilidade seguransa.

Tuir Norma Operasionál Prosedura (NOP), knaar KPF iha kada suku atu halo identifikasaun no mediasaun ba problema ne’ebé akontese no informa kauza hosi problema sira-ne’e ba PNTL atubele rezolve ho dame.

“Polísia kontinua haforsa ligasaun servisu liuhosi Ofisiál Polísia Suku (OPS) mak koordena direta ho Konsellu Polísiamentu Komunitáriu (KPK) atu identifika, prevene no halo mediasaun. Bainhira kazu ruma akontese iha tendénsia ba violénsia, bele informa lalais ba polísia atu atua,” Komandante Henrique ba Agência Tatoli iha Kuartél Jerál PNTL, Caicoli, Dili, kuarta ne’e.

Daudaun ne’e, Komandu PNTL Dili fó ona formasaun oin-oin ba membru KPK hodi kompleta sira-nia estrutura iha suku 36 ne’ebé pertense ba Munisípiu Dili ho membru na’in-50 resin.

“KPK sira sai liman-ain ba ita-nia OPS sira hodi asegura di’ak liután seguransa iha idak-idak nia suku. Seguransa ne’e presiza kontribuisaun hosi ema hotu-hotu,” nia hateten.

Henrique hatutan, PNTL Dili mós estabelese ona membru OPS iha suku 36 hodi hala’o mós knaar seluk hanesan kontrola movimentu transporte públiku iha estrada inklui koopera ho KPK sosializa programa dame ba grupu juventude.

Komandu PNTL Dili rasik koopera ho Unidade Espesiál Polísia (UEP), Unidade Polísia Marítima (UPM), Unidade Polísia Fronteira (UPF) no Polísia Task Force Dili, hodi halo mós operasaun rutina iha área sira ne’ebé risku iha sidade Dili.

Komandu PNTL mós koopera ho Servisu Investigasaun Kriminál Nasionál (SIKN) halo kontrolu mós ba sidadaun sira ne’ebé lansa informasaun falsa iha faceebok hodi kria problema, sei investiga no detein autór sira tuir lei.

Jornalista: Eugénio Pereira

Editór: Xisto Freitas