Komandante PNTL Munisípiu Dili, Superintendente Xefe Henrique da Costa, Imajen/Tatoli.

DILI, 27 janeiru 2021 (TATOLI)–Hahú janeiru tinan ne’e, Polísia Nasionál Timor-Leste (PNTL) sei implementa programa “Polísia Vizita Eskola no Polísia Vizita Kampus” ho objetivu sosializa servisu polísia ba estudante sira atu evita ransu livre no envolve iha kazu krime.

Programa ne’e nia alvu sei implementa iha eskola nível ensinu pré-eskolár, ensinu báziku, ensinu sekundáriu no ensinu superiór sira.

Polísia sei partilla informasaun iha área prioridade tolu hanesan sosializa Lei Arma Branka númeru 5/2017, Lei Kódigu Estrada tuir dekretu lei númeru 6/2003, loron 03 abríl, ne’ebé ko’alia kona-ba servisu PNTL iha implementasaun lei Kódigu Estrada hodi kontrola sidadaun sira uza transporte respeita sinál tránzitu atubele redúz insidente no asidente tráfegu iha Dili no lei krime droga nian.

“Programa ne’e atu eduka estudante sira-nia mentalidade para sai estudante ida profisionál no kualidade,” Komandante Polísia Munisípiu Dili, Superintendente Xefe, Henrique da Costa informa ba Agência Tatoli iha Kuartél Jerál PNTL, Caicoli, Dili, kuarta ne’e.

Tuir nia, estudante sira presiza kontribui ba dame hodibele konkretiza sira-nia kapasidade hotu-hotu. Nune’e mós importante ba dezenvolvimentu sosiál no ba kreximentu ekonómiku Timor-Leste.

Iha primeira semana janeiru ne’e, PNTL Dili hahú vizita ona eskola sekundáriu balun iha Postu Administrativu Kristu Rei no Metinaro hodi sosializa programa refere.

“Ami simu ona kontatu hosi eskola balun iha Dili atu fó treinamentu ba sira kona-ba prosesu isár bandeira nasionál,” Henrique hateten.

Tuir PNTL nia haree, dalabarak estudante no públiku seidauk hatene kona-ba funsaun sinál tránzitu, atributu seguransa bainhira uza transporte, no funsaun lei tránzitu nian, mak loron ba loron sempre akontese asidente tráfegu, no kontra regulamentu tránzitu nian hanesan laiha dokumentu veíkulu.

Jornalista: Eugénio Pereira

Editór: Xisto Freitas

1 KOMENTÁRIU

  1. Programa ida ne’e diak no importante tebes ba oan sira iha escola,mai ita hotu tau ita nia atensaun ba labarik sira iha eskola hanesan futuru nasaun nian,hanesan inan aman ami sujere se bele karik programa sira hanesan nee hatama iha materia ekstra obrigatorio ,obrigado barak ba maun policia sira nia inisiativo diak nee.

HAKEREK NO HATÁN

Please enter your comment!
Please enter your name here