Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 27 janeiru 2021 (TATOLI)–Komandu Polísia Munisípiu Dili, tersa (26/01) lokoraik, detein uma-kain ida kompostu hosi ema na’in-10, tanba fasilita abitante ida (feto) ho inisiál JA tinan 35 tama ilegál hosi Atambua-Indonézia mai Timor-Leste.

“PNTL identifika família na’in-10 mak fasilita JA viajen hosi Atambua hela subar iha sira-nia rezidénsia iha área Aldeia Kakeu-Laran, Suku Becora, Postu Administrativu Kristu Rei, Munisípiu Dili,” Komandante Polísia Munisípiu Dili, Superintendente Xefe, Henrique da Costa ba jornalista iha Kuartél Jerál PNTL, Caicoli, Dili, kuarta ne’e.

JA viajen hosi Atambua iha 16 janeiru 2021 hodi hela-subar liu-tiha loron 10 mak Polísia Eskuadra Kristu Rei hamutuk ho Ekipa Prevensaun COVID-19 Munisípiu Dili simu informasaun hosi komunidade hodi bá halo identifikasaun no lori família kompostu na’in-10 ne’e inklui JA bá hela iha Kuarentena Tibar, Liquiçá, hodi evita COVID-19 labele hada’et.

Henrique dehan, sidadaun hirak-ne’e bainhira ramata submete ba kuarentena obrigatória durante loron 14, polísia sei foti halo investigasaun, tanba konsidera kontra regra Estadu Emerjénsia (EE) dasiak.

Komandu PNTL kontinua apela ba timoroan sira iha kapitál Dili atu hato’o keixa ba autoridade seguransa, bainhira identifika ema seluk tama ilegál liuhusi fronteira terrestre no tasi nian.

Komandante Henrique haktuir, iha Atambua-Indonézia COVID-19 kontinua fó ameasa, tanba ne’e husu abitante sira mantein medida prevensaun, uza máskara, fase liman ho sabaun, mantein distánsia metru ida ka liu no evita halibur-malu.

Jornalista: Eugénio Pereira  

Editór: Xisto Freitas

HAKEREK NO HATÁN

Please enter your comment!
Please enter your name here