Prezidente Autoridade RAEOA-ZEESM-TL, Arsénio Bano, hala’o enkontru ho sekretáriu rejionál sira hodi halo koordenasaun servisu ne’ebé di’ak ba programa cesta bázika ne’ebé atu implementa iha RAEOA. Imajen/Mídia RAEOA.

DILI, 27 Janeiru 2021 (TATOLI)–Prezidente Autoridade Rejiaun Administrativa Espesiál Oé-Cusse (RAEOA) no Zona Espesiál EkonomiaSosiál Merkadu Timor-Leste (ZEESM TL), Arsénio Bano, hala’o enkontru ho sekretáriu rejionál sira atu halo koordenasaun servisu ne’ebé di’ak atu bele halo programa cesta bázika ne’e bele la’o susesu iha RAEOA.

Liuhosi enkontru ne’e, Arsenio Bano husu ba sekretáriu rejionál sira atu hamatan didi’ak programa cesta bázika tuir ninia regra no prosedimentu sira-ne’ebé Governu sentrál define antes programa cesta bázika ne’e implementa iha RAEOA-ZEESM TL.

“Ha’u hanoin objetivu hosi enkontru ida-ne’e atu halo koordenasaun servisu entre Sekretáriu Rejionál sira ho di’ak atu programa Cesta Bázika bele realiza no hetan susesu iha RAEOA,” Arsenio Bano hateten ba Agência TATOLI liuhosii telefónika, kuarta ne’e.

Presidente RAEOA hatutan, programa cesta bázika hanesan inisiativa ida iha ámbitu Planu Rekuperasaun Ekonómia ne’ebé fornese ai-han no produtu sira ba ijiene pesoál nian ba populasaun sira iha nasaun Timor-Leste.

Tamba ne’e, nia dehan, objetivu boot hosi medida ida-ne’e mak atu tulun família sira hodi hatán ba sira-nia nesesidade bázika hodi kontribui no vulnerabilidade boot liu hirak ne’ebé eziste iha munisípiu 12 inklui RAEOA.

Ho programa Cesta Bázika ne’e, nia hatutan, sei fó apoiu ba agrikultór, produtór no komersiante lokál sira atu estimula dinámika ekonómia lokál sira liuhosi sirkulasaun rekursu finanseiru sira-ne’ebé nesesáriu atu hasa’e produsaun nasionál, hodi redús impaktu sira hosi krize ekonómia.

Enkontru kona-ba Programa Cesta Bázika ne’e hala’o iha koordenasaun no partisipa hosi Sekretáriu Rejionál Adjuntu Prezidente Autoridade Asuntou Sosiál Maximiano Neno, Sekretáriu Rejionál Administrasaun  Martinho Abani Elu, Sekretáriu Rejionál Agrikultura José Eta, Sekretáriu Rejionál Komérsiu no Indústria Pedro da Cunha B. da Silva, Sekretária Rejionál Edukasaun no Solidariedade Sosial, Abelina da Costa, no mós ekipa tekniku apoiu Gabinete PA, Oebau, Pante Makassar.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here