Traballadór umanitáriu hosi organizasaun mundiál sira no korpu diplomátiku sira to’o iha Aeroportu Comoro, kuarta (03/09). Imajen Tatoli/António Gonçalves

DILI, 27 janeiru 2021 (TATOLI)-Ministru Transporte no Komunikasaun, José Agostinho da Silva, hateten bainhira halo ratifikasaun ba akordu aéreu entre Repúblika Demokrátika Timor-Leste (RDTL) no Austrália bele fasilita hametin konetividade entre nasaun rua ne’e.

“Ratifikasaun akordu servisu aéreu, loke dalan iha futuru aviaun sira bele sirkula komersialmente iha Timor-Leste hodi asegura konetividade aéreu entre nasaun rua ne’e,” Ministru José Agostinho, informa hafoin partisipa reuniaun Konsellu Ministru iha Pálasiu Governu, Dili, kuarta ne’e.

Notísia relevante: PN aprova proposta lei akordu servisu aéreu RDTL-Austrália iha jeneralidade

Proposta-lei númeru 4/V/2a ne’e aprovadu ona iha faze jeneralidade ho rezultadu votu a-favór 45, kontra rua no abstensaun 12.

“Vantajen bainhira iha akordu no ratifika, Governu Austrália iha baze legál atu designa sira-nia aviaun hanesan Qantas ou Virgin mai Timor-Leste atubele asegura  konetividade aéreu entre país rua,” Ministru esplika.

Daudaun ne’e aviaun Airnorth, mak asegura konetividade entre Timor-Leste no Austrália, maibé to’o de’it iha Darwin, ho tipu viajen charter, katak iha nesesidade mak semo.

Aleinde ne’e, inisiativa ne’e fó vantajen bainhira atu halo viajen aviaun la’ós de’it bá Darwin, maibé loke tan espasu ida atubele halo viajen husi Dili bá sidade boot sira seluk iha Austrália.

“Bainhira Parlamentu Nasionál ratifika ona akordu aéreu ne’e, hahú iha serteza oráriu ba aviaun Austrália semo mai Timor-Leste no bele mós ba Aeroportu Melbourne, Sidney, Adelaide no sira seluk.

Akordu ne’e mós ho espíritu vise versa entre parte rua no loke dalan ba Governu Austrália  hodi designa sira-nia aviaun.

“Ita hatene Timor-Leste seidauk iha aviaun rasik, ne’ebé ita tenke estabelese duni akordu sira  atu loke dalan ba nasaun viziñu hametin konetividade no ba futuru bainhira ita-nia aviaun iha rasik mós akordu ne’e fasilita ona. Ha’u hanoin pasu importante durante ne’e tanba parte Governu Austrália ratifika ona no hein de’it ita-nia bainhira ratifika hotu bele fasilita ona ,” nia akresenta.

Lejizlasaun ne’e asina ona husi país rua ne’e iha tinan 2017, no ratifika ona husi Austrália, maibé parte Timor-Leste seidauk.

Nune’e, proposta rezolusaun ne’e bazeia ba nasaun rua nia hakarak atu promove sistema aviasaun internasionál ida ne’ebé iha konkorrénsia entre empreza transporte aéreu sira iha merkadu, ho servisu sira ne’ebé kompetitivu, inovadór no seguru nian sira.

Ho ratifikasaun akordu ne’e, kompañia aérea sira sei bele tama iha espasu aéreu husi nasaun rua ne’e nian la presiza autorizasaun prévia, maibé kumpre ona rekizitu regulamentár inklui  seguransa, no ida ne’e sei permite hasa’e konkorrénsia, ne’ebé bele hamenus folin billete no transporte merkadoria.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here