Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão.

DILI,27 janeiru 2021(TATOLI)—Ministru Ensinu Superior Siénsia no Kultura (MESSK) Longuinhos dos Santos dezafia reitór eleitu ba periúdu 2021-2026, João Martins atu halo revizaun ba estatutu Universidade Nasionál Timor Lorosa’e (UNTL), durante nia mandatu.

“Ha’u dezafia reitór eleitu ne’ebé sei simu pose iha 29 janeiru, atu iha vontade hodi halo revizaun ba estatutu UNTL inklui rejimi karreira ba dosente sira,” Longuinhos dos Santos hateten ba jornalista sira, hafoin reuniaun Konsellu Ministru iha Palásiu Governu, kuarta (27/01).

Notísia Relevante:Estatutu UNTL sei hetan revizaun iha 2021

Governante ne’e dezafia atu halo revizaun tanba estatutu UNTL sei kontinua konsidera de’it fakuldade hitu, hodi ignora tiha fakuldade filozofia ho siénsia ezata no rejimi karreira ba dosente sira.

“Ha’u haree estatutu la kondís ona ho kondisaun balun, tanba iha UNTL ezisti fakuldade sia, maibé iha ne’ebá rekoñese de’it fakuldade hitu,” nia subliña.

Antes ne’e reitór eleitu João Martins hato’o nia kompromisu iha ámbitu eleisaun ne’ebé hala’o iha salaun fakuldade enjeñaria Hera katak, sei hakaas aan atu halo revizaun ba estatutu ne’e iha 2021, tanba konsidera la serve ona atu eleva kualidade instituisaun nian.

Tuir nia haree katak, estatutu ne’e rasik hamosu birokrasia boot iha parte administrasaun  nian ne’ebé sei hamosu obstákulu ba futuru UNTL.

Entretantu, estatutu UNTL hatuur iha Dekretu-Lei 16/2010 ne’ebé aprovadu iha Konsellu Ministru iha 25 agostu 2010, tempu Primeiru-Ministru, Kay Rala Xanana Gusmão no Ministru Edukasaun, João Câncio Freitas.

Dekretu-Lei ne’e promulgadu hosi Prezidente Repúblika, José Ramos Horta iha 12 outubru 2010, no publika ona iha Jornál Repúblika ho nia kapítulu VI artigu 62.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here